ԵԽ պատգամավորը կոչ է արել ԼՂ շփման գծում կիրառել հրադադարի խախտումները հետաքննող մեխանիզմ
1 րոպեի ընթերցում
ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: Ռազմական հակամարտությունը Լեռնային Ղարաբաղի հիմնախնդրին լուծում չի կարող առաջարկել: Ինչպես հաղորդում է «Արմենպրես»-ը, այս մասին Եվրախորհրդարանում ունեցած ելույթի ժամանակ ասել է Կիպրոսը ներկայացնող եվրապատգամավոր Մավրիդիս Կոստասը:
Նա նշել է հրադադարի ռեժիմի խախտումները հետաքննող մեխանիզմների կիրառման կարևորությունը` ընդգծելով, որ ԵԱՀԿ Մինսկի խմբի համանախագահները պետք է կոչ անեն հայկական և ադրբեջանական կողմերին ընդունել նման մեխանիզմի կիրառումը:
«Առանց այս մեխանիզմի կիրառման կողմերը կշարունակեն մեղադրել իրար հարձակումներ նախաձեռնելու հարցում: Հայաստանը համաձայնվել է քննարկել նման մեխանիզմի կիրառման մանրամասները, իսկ Ադրբեջանը` հրաժարվել»,- արձանագրել է Կոստասը: Պատգամավորը հավելել է, որ տվյալ մեխանիզմի կիրառման պարագայում երկու կողմերում էլ հնարավոր կլինի փրկել մարդկային կյանքեր: