Հայոց ցեղասպանության թանգարան-ինստիտուտն ու ողջ հայությունը պատվով կատարեցին իրենց գործը. Դեմոյանն ամփոփեց տարին

ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Հայությունը կարողացավ համակարգված ու ներկայանալի կերպով իրականացնել Հայոց ցեղասպանության 100-րդ տարելիցի միջոցառումները: «Արմենպրես»-ի փոխանցմամբ` սա Հայոց ցեղասպանության թանգարան-ինստիտուտի տնօրեն Հայկ Դեմոյանի ամենահամեստ գնահատականն է 2015-ի իրադարձություններին: «Մթնոլորտը խիստ դրական էր թե´ ՀՀ քաղաքացիների, թե´ սփյուռքայերի, թե´ օտարերկրացիների շրջանում: Մենք որպես հայություն կարողացել ենք ներկայանալի կերպով տեղ հասցնել մեր ասելիքը: Սա իմ բազմաթիվ ճանապարհորդությունների, իմ հանդիպումների, շփումների արդյունքում մեծամասամբ հնչած կարծիքն է իրականացված աշխատանքների ծավալի, դրանց բովանդակության ու ազդեցության մասին»,-ասաց Հայկ Դեմոյանը` հավելելով, որ թեմայի վերաբերյալ իրազեկության աննախադեպ բարձրացում են արձանագրել: «Մարդիկ, ովքեր իրազեկված չէին, գոնե ստացան տարրական գիտելիքներ Հայոց ցեղասպանության մասին»,-ավելացրեց նա:

Հայկ Դեմոյանը կարևոր համարեց, որ սկսած աշխատանքները լինեն շարունակական, քանզի թեման ոչ թե պատմության դժվարին շրջանին վերադարձն է, այլ ուղղված է ապագայում նման ոճրագործությունների կանխարգելմանն ու Հայաստանի անվտանգության ապահովմանը: «Այն, ինչ կուտակվեց 2015-ին, կարևոր է, որ չմարի, քանի որ խոսելով Հայոց ցեղասպանության թեմայի մասին, մենք մի քանի խնդիր ենք լուծում: Առաջինը բարձրացնում ենք Հայաստանի Հանրապետության և Լեռնային Ղարաբաղի անվտանգության ապահովման հարցը: Բացի այդ մենք թույլ չենք տալիս Թուրքիայի ժխտողական արտաքին քաղաքականության առաջխաղացումը»,-ասաց Հայկ Դեմոյանը:

Նրա խոսքով` կատարված աշխատանքի արգասիքներից է համահայկական համակարգված աշխատանքը, որն էլ հիմք դարձավ Հայոց ցեղասպանության 100-րդ տարելիցի միջոցառումները համակարգող պետական հանձնաժողովի` նոր ձևաչափով հանդես գալու համար:

Անդրադառնալով Հայոց ցեղասպանության թանգարան-ինստիտուտի գործունեությանը` Հայկ Դեմոյանը փաստեց, որ տարեսկզբին իրենց առջև դրված խնդիրները լուծել են եռակի ու քառակի ավելի: «Մենք այս ամենից դուրս եկանք պատվով: Թանգարան-ինստիտուտը վերածվեց մի հաստատության, որին էին ուղղված ամբողջ աշխարհի հայացքները»,-հավելեց Դեմոյանը: Նա նկատեց, որ թանգարանում ցուցանմուշների թիվն արդեն հասնում է 100 հազարի շեմին:

Դեմոյանը նաև կարևորեց աշխարհի 50-ից ավելի քաղաքներում ժամանակավոր ցուցադրությունների կազմակերպումը` դրանց մեջ առանձնացնելով Փարիզում, Լոս Անջելեսում և Մոսկվայում կայացածները: