Վերոնիկա Զոնաբենդը կին գործարարներին խորհուրդ տվեց հավատալ իրենց սկսած գործին և սիրով կատարել այն
3 րոպեի ընթերցում
ԵՐԵՎԱՆ, 8 ՀՈՒՆԻՍԻ, ԱՐՄԵՆՊՐԵՍ: Գործարար միջավայրում հաջողության հասնելու համար կին ձեռներեցները պետք է մտածեն ապագային ուղղված գործունեություն ծավալելու մասին: Այս կարծիքին է «Հայաստանի զարգացման նախաձեռնություններ» հիմնադրամի (IDeA ) համահիմնադիր Վերոնիկա Զոնաբենդը, ով ելույթ ունեցավ Երևանում անցկացվող Կանանց ձեռներեցության միջազգային համաժողովում:
Զոնաբենդը համաժողովի մասնակցող կին գործարարներին խորհուրդ տվեց զարգացնել ձեռներեցության ոգին, լինել կարեկցող ու հավատալ իրենց սկսած գործին: «Ուզում եք հաջողության հասնել, պետք է հավատաք այն ամենին, ինչ նախաձեռնել եք: Դրա հետ մեկտեղ անհրաժեշտ է խստապահանջություն և հավասարակշռվածություն: Եթե բիզնեսն ուղղված է ապագային, ապա պետք չէ մոռանալ երիտասարդների մասին, որոնց համար ձեր նախաձեռնությունը պետք է հետաքրքիր լինի: Եվ ամենակարևորը` ցանկացած գործ պետք է կատարել սիրով, որովհետև միայն այդպես կարելի է հասնել այն ամեինին, ինչին չեն կարողանում հասնել մյուսները»,- ասաց IDeA հիմնադրամի համահիմնադիրը:
Համաժողովին մասնակցում էր նաև Արժույթի միջազգային հիմնադրամի երևանյան գրասենյակի ղեկավար Տերեսա Դաբան Սանչեսը, ով ներկայացրեց աշխարհում կանանց ձեռներեցությանը վերաբերող տվյալներ: «Ամբողջ աշխարհում կանանց մասնակցությունը բիզնես միջավայրում ավելի ցածր է: Աշխարհի բնակչության կեսից ավելի կանայք են, սակայն նրանց մասակցությունը աշխատանքի շուկայում գրեթե 25 տոկոս է: Աշխարհում կա միտում, որ աղքատ երկրներում կանայք ավելի շատ են աշխատում, իսկ միջին եկամուտներ ունեցող երկրներում, ինչպես, օրինակ, Հայաստանում, ավելի թույլ է կանանց ներգրավվածությունը»,- ասաց ԱՄՀ ներկայացուցիչը:
Նա հայտնեց, որ տարբեր վերլուծություններով` կանայք հիմնականում ներգրավված են փոքր և միջին բիզնեսում, քանի որ մեծ ժամանակ են տրամադրում ընտանիքին: «Որոշ երկրներում, օրինակ, երխաներին խնամելու համար արձակուրդ են տալիս, ոչ միայն կանանց, այլև տղամարդկանց: Պետք է նշել, որ այն երկրներում, որտեղ մատչելի է երեխաների խնամքը, մեծ է կանանց ներգրավվածությունը տնտեսության մեջ»,- ասաց նա և ընգծեց, որ մեկ անձին բաժին ընկնող ՀՆԱ-ն մեծ է այն տնտեսություններում, որտեղ շատ են ձեռներեց կանայք: