2 րոպեի ընթերցում
ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ: Անալոգային հեռարձակումից թվային հեռարձակման անցնելու ժամանակացույցը ՀՀ կառավարությունը կերկարաձգի՝ 2015 թվականի հուլիսի 1-ից այն սահմանելով 2016 թվականի հունվարի 1-ը: «Արմենպրես»-ի փոխանցմամբ՝ ««Հեռուստատեսության և ռադիոյի մասին» ՀՀ օրենքում փոփոխություններ կատարելու մասին» նախագիծն ընդգրկված է կառավարության մայիսի 21-ի նիստի օրակարգում: Նախաձեռնությունը պայմանավորված է Հայաստանում թվային ռադիոհեռարձակման անցման ժամկետների փոփոխության անհրաժեշտությամբ։ Համաձայն գործող օրենքի, 2010 թվականի հուլիսի 20-ից մինչև 2015 թվականի հուլիսի 1-ը համարվում է անալոգային հեռարձակումից թվային հեռարձակման անցման ժամանակաշրջան, որի ընթացքում պետության կողմից անհրաժեշտ ենթակառուցվածքների ապահովմամբ իրականացվում է աստիճանական (ըստ Հայաստանի Հանրապետության առանձին մարզերի) անցում թվային հեռարձակման: Նախագծի հիմնավորման համաձայն՝ ՀՀ տրանսպորտի և կապի նախարարության կողմից կառուցված է թվային հեռուստահեռարձակման ցանցի 90 տոկոսը, որը ավարտին կհասցվի և ամբողջությամբ պատրաստ կլինի շահագործման մինչև սույն թվականի հուլիսի 1-ը, ընդ որում ներկայումս իրականացվում է նաև թվային հեռարձակում, որը հասանելի է ՀՀ բնակչության 90 տոկոսին:
«Օրենսդրական նախաձեռնությամբ առաջարկվող` անալոգային հեռարձակումից թվային հեռարձակմանն անցումը վեց ամսով երկարաձգելը հնարավորություն կտա հստակեցնել ՀՀ վերգետնյա թվային հեռուստահեռարձակման համակարգի ներդրման շրջանակներում սոցիալական ծրագրի մոտեցումները և միևնույն ժամանակ անալոգայինից թվային հեռարձակմանը անցման գործընթացը դարձնել ավելի սահուն և ամբողջական: Այն հնարավորություն կտա նաև ապահովել հանրության առավել արդյունավետ իրազեկում»,- նշված է հիմնավորման մեջ:
Լուսանկարը` Հայաստանի Հանրային Հեռուստաընկերությանկայքի