3 րոպեի ընթերցում
ԵՐԵՎԱՆ, 13 ՕԳՈՍՏՈՍՒ, ԱՐՄԵՆՊՐԵՍ: Ռուսաստանի համար ձեռնտու չէ Ադրբեջանի այնպիսի հզորացում, ինչը կհանգեցնի հավասարակշռության խախտման եւ պատերազմի: Օգոստոսի 13-ին լրագրողների հետ հանդիպմանն այսպիսի կարծիք հայտնեց ռազմական փորձագետ Դավիթ Ջամալյանը: «Ռուսաստանին այս պահին պետք է ուժեղ եւ կայուն Հայաստան: Այն, որ մենք Ռուսաստանի հետ ռազմավարական դաշնակիցներ ենք, խոսում է այն մասին, որ ինչքան Ռուսաստանն է կաեւոր գործընկեր մեզ համար, այնքան էլ Հայաստանն է կարեւոր Ռուսաստանի համար»,- «Արմենպրես»-ի հաղորդմամբ՝ ասաց նա՝ ընդգծելով, որ տարածաշրջանի ապակայունացումը ոչ մի դեպքում ձեռնտու չի կարող լինել Ռուսաստանի համար: Հայաստանն էլ իր հերթին պետք է այնքան ուժեղ լինի, որ կարողանա զսպել տարածաշրջանում ապակայունացման ցանկացած քայլ:
Փորձագետի խոսքով՝ Ադրբեջանի եւ Ռուսաստանի հարաբերություններն այնքան էլ անամպ չեն, որքան թվում է: Նա նշեց, որ Ռուսաստանը, Ադրբեջանին մեծ քանակությամբ զենք վաճառելով, փորձեց Ալիեւին ավելի ռուսամետ դարձնել, սակայն էականորեն որեւէ բան չի փոխվել: «Հակառակը, այդ գործարքը կարծես ավելի լկտիացրեց Ադրբեջանին»,- ասաց նա՝ ընդգծելով, որ ՌԴ նախագահ Վլադիմիր Պուտինի Բաքու կատարելիք այցի նախօրեին Ռուսաստանում ազգային անվտանգության աշխատակիցները ադրբեջանական նավ էին հայտնաբերել, որը գողացված ռուսական նավթ էր տեղափոխում Բաքու: Բանախոսն ընդգծեց, որ Ադրբեջանը բավական ծանր վիճակում է հայտնվել եւ պետք է փորձի ելք գտնել իրավիճակից դուրս գալու համար:
Ռուսաստանի Դաշնության նախագահ Վլադիմիր Պուտինը օգոստոսի 13-ին աշխատանքային այց կկատարի Ադրբեջան: Ռուսական պատվիրակության կազմում են արտաքին գործերի նախարար Սերգեյ Լավրովը, պաշտպանության նախարար Սերգեյ Շոյգուն, էներգետիկայի նախարար Ալեքսանդր Նովակը, արտակարգ իրավիճակների նախարար Վլադիմիր Պուչկովը, տրանսպորտի նախարար Մաքսիմ Սոկոլովը, էներգետիկ զարգացման Ալեքսեյ Ուլյուկաեւը, «Ռոսպբորոնէքսպորտ» ընկերության տնօրեն Անատոլի Իսայկինը: Այս ամենից ենթադրվում է, որ բանակցությունների ընթացքում նախատեսվում է քննարկել երկկողմ հարաբերությունների գրեթե ամբողջ համալիրը: