1 րոպեի ընթերցում
ԵՐԵՎԱՆ, 9 ՕԳՈՍՏՈՍԻ, ԱՐՄԵՆՊՐԵՍ: Հայաստանի շախմատի կանանց հավաքականի անդամ եւ Եվրոպայի անհատական առաջնության բրոնզե մեդալակիր Լիլիթ Մկրտչյանը գոհ է իր արդյունքից Եվրոպայի առաջնությունում:Ինչպես «Արմենպրես»-ի հետ զրույցում ընդգծեց Մկրտչյանը, Եվրոպայի առաջնությունը բարձր վարկանիշ ունի, եւ նման մրցաշարում մրցանակային տեղ զբաղեցնելն արդեն իսկ առաջընթաց է:
«Եվրոպայի անհատական մրցաշարում մրցանակային տեղն ինձ հնարավորություն տվեց մասնակցել նաեւ աշխարհի առաջնությանը»,- ասաց շախմատիստուհին:
Շախմատիստուհին, խոսելով հետագա ծրագրերի մասին, ասաց, որ այսօր` օգոստոսի 9-ին մեկնում է Չինաստան` մասնակցելու Չինաստանի ակումբային առաջնությանը, որին զուգահեռ կնախապատրաստվի Եվրոպայի թիմային առաջնությանը` հանդես գալով Հայաստանի հավաքականի կազմում:
Լիլիթ Մկրտչյանը Եվրոպայի անհատական առաջնությունում, 9 հնարավորից վաստակելով 8 միավոր, դարձել է Եվրոպայի բրոնզե մեդալակիր: