Հայաստանը պետք է այժմ ճկուն քաղաքականություն վարի ԵՄ-ի եւ ՌԴ-ի հետ հարաբերություններում. Հրանտ Մելիք-Շահնազարյան

ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Հայաստանը դարձել է Ռուսաստան-Արևմուտք մրցակցային հարաբերությունների թատերաբեմերից մեկը: Այսպիսի կարծիք հայտնեց քաղաքագետ Հրանտ Մելիք-Շահնազարյանը հուլիսի 15 լրագրողների հետ հանդիպման ժամանակ: Ըստ նրա` վաղուց այդպիսի միտում չէր նկատվում, քանի որ աշխարհաքաղաքական մրցակցությունը Հարավային Կովկասից հարակից տարածաշրջաններ էր տեղափոխվել: «Սիրիայում ստեղծված իրավիճակը այնքան է լարել հարաբերությունները Ռուսաստանի և ԱՄՆ-ի, ինչպես նաև ԵՄ-ի միջև, որ այսօր այդ լարվածության պատճառով դժվար իրավիճակում են հայտնվել այն երկրները, որոնք ավանդորեն դուրս էին մնացել այս մրցակցությունից»,-ասաց Հրանտ Մելիք-Շահնազարյանը:

Նրա խոսքերով` այս պահի դրությամբ բոլոր այն քննարկումները և խնդրահարույց հարցերը, որոնք բարձրացվում են թե Ռուսաստանի, թե Արևմուտքի, մասնավորապես, ԱՄՆ-ի կողմից, բարձր մակարդակով չեն արտահայտվում, այլ ավելի շատ փորձագիտական շրջանակներում են քննարկվում:«Այսօր մենք տեսնում ենք, որ հայ և ռուս քաղաքագետների միջև սկիզբ առած պոլեմիկան` կապված դեպի Ռուսաստան կամ Արևմուտք Հայաստանիընտրության հետ, ավելի շատ հուզայնականության վրա է հիմնված: Ռուս փորձագետներին կարելի է հասկանալ, քանի որ նրանք տարիներ շարունակ եղել են Հայաստանի դիրքերից հանդես եկող քաղաքագետներ և այսօր պատասխանատվության զգացում ունեն այն բանի համար, թե ինչպես ստացվեց, որ նրանց հովանավորյալ երկիրը սկսեց հավասարաչափ հարաբերություններ զարգացնել Արևմուտքի և Ռուսաստանի հետ միաժամանակ»,- նկատեց Հրանտ Մելիք-Շահնազարյանը:

Քաղաքագետի խոսքերով` Ռուսաստանի և Արևմուտքի հետ աշխատանքները պետք է երկու մակարդակներում իրականացնել` բարձր պաշտոնյաների շփումների ձևով, որոնք միշտ եղել են, և փորձագիտական մակարդակում քննարկումների միջոցով, որոնք միշտ թերացել են: Արդյունքում այն մարդիկ, ովքեր հանրային կարծիք են ձևավորում, տպավորություն է ստեղծվում, որ աշխատում են այլ ճանապարհներով, քան դա անում են պետության ղեկավարները միջպետական հարաբերություններում: «Ստացվոււմ է միջպետական մակարդակում խնդիրներ չկան, բայց հասարակությունների ներսում խնդիրներն առաջացել են և գնալով խորանում են»,-նշեց քաղաքագետը: Իսկ ինչ վերաբերում է Արևմուտքի հետ հարաբերություններին, Հրնատ Մելիք-Շահնազարյանը կարծում է, որ ԵՄ-ն ավելի փափուկ դիրքերից է փորձում հանդես գալ: «ԵՄ-ն որևէ պարտադրանքներ և երկընտրանքներ պաշտոնական մակարդակներում չի առաջադրել, իհարկե այն երկրների նախագահները, խոսքս հատկապես Լեհաստանի նախագահին է վերաբերում, որոնց քաղաքականությունը Ռուսաստանի դեմ է ուղղված եղել ավանդականորեն, կփորձեն հնարավորիս սրել հայ-ռուսական հարաբերությունները»,-ընդգծեց քաղաքագետը: Նա համոզված է, որ հայկական դիվանագիտությունը ճկուն աշխատելու հնարավորություն է ստացել և, եթե դա օգտագործվի, մրցակցային իրավիճակներում կարելի է հետաքրքիր նախաձեռնություններով հանդես գալ, որը կբերի Հայաստանի` ԵՄ-ի և Ռուսաստանի հետավելի մտերիմ հարաբերությունների ձևավորելուն: