Ադրբեջանի իշխանությունն ուշացումով գիտակցեց Սաֆարովի գործարքի սխալ լինելը. Թոմաս դը Վաալ

ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: Հայ սպա Գուրգեն Մարգարյանին քնած վիճակում կացնահարած ոճրագործ Ռամիլ Ռաֆարովն Ադրբեջանում ազգային հերոս չի ընկալում, իսկ շատ ադրբեջանցիներ զարհուրած են կատարվածից: Այդ մասին հուլիսի 2-ին լրագրողների հետ հանդիպմանն ասաց «Քարնեգի» հիմնադրամի Ռուսաստանի ու Եվրասիայի ծրագրերի ավագ վերլուծաբան Թոմաս դը Վաալն՝ անդրադառնալով ոճրագործ Ռամիլ Սաֆարովի կերպարի ընկալմանն Ադրբեջանում: «Նա ազգային հերոս չէ: Իհարկե շատ շատերի համար նա հերոս է, բայց ես անձամբ գիտեմ բազմաթիվ մարդկանց, ովքեր սարսափած են տեղի ունեցածից»,- «Արմենպրես»-ի հաղորդմամբ՝ ասաց դը Վաալը՝ հավելելով, որ Ադրբեջանի իշխանություններն ուշացումով են հասկացել, որ Սաֆարովին ազատելը սխալ է, ինչի վկայությունն էր նրա անհետացումը տեսադաշտից: «Ես կարծում եմ, որ այդ քայլի հանդեպ (խմբ. Սաֆարովին ներում շնորհելու) արտաքին աշխարհի արձագանքը թերի է հաշվարկվել»,- ասաց դը Վաալը:

Ռամիլ Սաֆարովը 2004-ի փետրվարի 19-ին Բուդապեշտում ՆԱՏՕ-ի անգլերենիեռամսյադասընթացներին մասնակցության ժամանակ գիշերը կացնի 16 հարվածներով դաժանաբար սպանել է քնած հայ սպային` Գուրգեն Մարգարյանին: Հունգարական դատարանը Սաֆարովին դատապարտել էր ցմահ բանտարկության` պատիժը 30 տարի չվերանայելու պայմանով, սակայն 2012-ի օգոստոսի 31-ին Սաֆարովն արտահանձնվել է Ադրբեջան, որտեղ պետք է շարունակեր կրել պատիժը: Ադրբեջանի նախագահ Իլհամ Ալիեւը նրան ներում էր շնորհել և ազատ արձակել՝ բարձրացնելով կոչումն ու վճարելով 8 տարվա կուտակված աշխատավարձը:Ոճրագործին ներում շնորհելու Ադրբեջանի քայլը խիստ քննադատության է արժանացել միջազգային հանրության կողմից: