Մոդեստ Կոլերովը մեկնաբանում է Ռուսաստանի կողմից Ադրբեջանին զենք մատակակարելու «կերոսինային դիվանագիտությունը»
2 րոպեի ընթերցում
![Մոդեստ Կոլերովը մեկնաբանում է Ռուսաստանի կողմից Ադրբեջանին զենք մատակակարելու «կերոսինային դիվանագիտությունը»](http://armenpress.am/resized/480/static/news/b/2013/06/723087.jpg)
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Ռուսաստանը կարող էր սեփական ռազմարդյունաբերական համալիրի շահերը պաշտպանել առանց «կերոսինային դիվանագիտության»: Նման դիտարկում արեց ռուս քաղաքագետ Մոդեստ Կոլերովը` «Արմենպրես»-ի խնդրանքով մեկնաբանելով Ռուսաստանի կողմից Ադրբեջանին զենք մատակարարելու մասին տեղեկատվությունը: Նրա կարծիքով` Ռուսաստանի Դաշնության կողմից Ադրբեջանին զենք մատակարարելու պատճառը ռազմական հավասարակշռություն ապահովելու անհրաժեշտությունն է, որը խաղաղություն պահպանելու նախապայմաններից է:Քաղաքագետը, սակայն, հավասարակշռության պահպանման այդ եղանակը ռիսկային համարեց: «Ավելի քան ակնհայտ է, որ Դաղստանի տեսանկյունից նայելով, ներկայիս Բաքուն Ռուսաստանի համար ընկեր չէ: Ես գտնում եմ, որ ռուսական ռազմաարդյունաբերական համալիրի շահերը կարող էին պաշտպանվել առանց այդպիսի «կերոսինային դիվանագիտության»»,- ասաց քաղաքագետը:
Անդրադառնալով ՀՀ-ՌԴ դաշնակցային հարաբերությունների ու ստատուս-քվոի վրա Ադրբեջանին զենքի մատակարարման հնարավոր ազդեցությանը` Կոլերովն ասաց.«Ադրբեջանը ՌԴ պաշտոնական հռետորաբանության մեջ թեեւ դաշնակից չի համարվում, սակայն բազմիցս հայտարարվել Ռուսաստանի ռազմավարական գործընկեր: Զենք վաճառելու հանգամանքը ստատուս քվոյի վրա չի ազդի, քանի որ Բաքուն ստանում է հարձակվողական ցամաքային սպառազինություն, իսկ Հայաստանը՝ պաշտպանական ՀՕՊ միջոցներ»:
Ռուսական լրատվամիջոցներով հունիսի 18-ին տեղեկություններ են տարածվել Ռուսաստանի կողմի Ադրբեջանին մեծ քանակով տանկեր, հետեւակի մարտական մեքենաներ ու այլ սպառազինություն վաճառելու մասին, որոնց ընդհանուր արժեքը 1 միլիարդ դոլար է: Ռուսաստանն ու Հայաստանը ռազմավարական դաշնակցային հարաբերություններ ունեն: