Քաղաքագետն ԼՂ հակամարտության բանակցային գործընթացի ռիթմը վերականգնելու միտում է նկատում
3 րոպեի ընթերցում
![Քաղաքագետն ԼՂ հակամարտության բանակցային գործընթացի ռիթմը վերականգնելու միտում է նկատում](http://armenpress.am/resized/480/static/news/b/2013/05/719894.jpg)
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Արցախյան հակամարտության կարգավորման գործընթացում բանակցությունների տեմպը վերականգնելու միտում կա: Մայիսի 23-ին լրագրողների հետ հանդիպմանը նման դիտարկում արեց քաղաքագետ Նարեկ Գալստյանը: «Բովանդակային տեսանկյունից կարծես թե փոփոխություն չկա, այսինքն նոր առաջարկություններ ու գաղափարներ առաջ չեն քաշվել: Բայց կա միտումբանակցային ռիթմըվերականգնելու»,- «Արմենպրես»-ի փոխանցամբ՝ ասաց Գալստյանը` հավելելով, որ ավելի հաճախ են սկսել քննարկվել դիպուկահարների եւ սահմանային միջադեպերի հետ կապված հարցերը:
Քաղաքագետի համոզմամբ՝ հայկական կողմը պետք է շարունակի պնդել բանակցային գործընթացում պաշտոնական լեռնային Ղարաբաղի Հանրապետության մասնակցության հարցը: Գալստյանը նշեց, որ արցախյան հակամարտության կարգավորման գործընթացում նոր խթան է անհրաժեշտ: «Իմ համոզմամբ` պաշտոնական Ստեփանակերտի մասնակցությունն ու վճռական խոսքն էլ ավելի կմոտեցնի վերջնակետին»,- ասաց Գալստյանը: Քաղաքագետը հիշեցրեց, որ Մադրիդյան սկզբունքները վերջնական չեն, եւ հաշտության պայմանագրի հիմքը պարտադիր չէ, որ բոլոր կետերը հանդիսանան:
Անդրադառնալով արցախյան հակամարտության մասին Ռուսաստանի Դաշնության արտգործնախարար Սերգեյ Լավրովի հայտարարություններին՝ քաղաքագետը նշեց, որ ոչ մի արտառոց բան դրանցում չկա, սակայն ցանկալի կլիներ, որ Հայաստանի ռազմավարական դաշնակիցն ավելի նուրբ ձեւակերպումներ տար: «Ռուսաստանը խոշոր գերտերություն է, որն իր շահերից բխող քաղաքականություն է վարում»,- ասաց Գալստյանը՝ հավելելով, որ Ռուսաստանը փորձում է վերականգնել իր միջնորդային ակտիվությունը բանակցային գործընթացում: Քաղաքագետը չի կարծում, որ եվրատեսիլյան խնդիրները լուրջ ազդեցություն են ունենալու ռուս-ադրբեջանական հարաբերությունների վրա:
Լավրովը հայտարարել էր, որ Լեռնային Ղարաբաղի հակամարտության հարցում ստատուս-քվոյի պահպանումն անընդունելի է,քանի որ Ռուսաստանի հարևանների, բարեկամների միջև առկա է երկարատև և դժվար հակամարտություն, իսկ Կովկասում կայունությունը և հանգստությունը հանդիսանում է մեր արտաքին քաղաքական առաջնայնություններից մեկը:
Արցախի դեմ պատերազմ սանձազերծած եւ պարտություն կրած Ադրբեջանը շարունակում է իր ապակառուցողական քայլերը հակամարտության կարգավորման հարցում: Ադրբեջանն իր համաձայնությունը չի տալիս անգամ շփման գծից դիպուկահարների հետքաշման եւ սահմանային միջադեպերի քննության մեխանիզմներ ստեղծելու համեմատաբար ոչ բարդ հարցերում: