ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Ադրբեջանի ժողովրդական գրող, Ադրբեջանում հայկական ջարդերի մասին պատմող «Քարե երազներ» գրքի հեղինակ Աքրամ Այլիսլիի դեմ Ադրբեջանի իշխանությունների հրահրած զանգվածային հետապնդումները գրականությունը քաղաքականացնելու փորձ են:«Արմենպրես»-ի թղթակցի հետ զրույցում Հայաստանի գրողների միության նախագահ Լևոն Անանյանը նշեց, որ «Քարե երազներ» վեպը միանշանակ խոսում է քաղաքացիական խիզախության մասին: «Այն երկրում, այն միջավայրում, որտեղ նա ապրում եւ ստեղծագործում է եթե ոչ հակացուցված է, ապա խիստ անբարենպաստ է այդ բնույթի ստեղծագործությունների համար»,- ասաց Անանյանը: Նրա բնորոշմամբ` հայրենասեր գրողին հաջողվել է իր գրքում արտահատել երկու տասնամյակի հեռվից եկող ցավը, մինչդեռ «Քարե երազներ»-ը մարդասիրության, հանդուրժողականությամբ եւ ներդաշնակության կոչ է: «Կատարվածը ոչ միայն տարածաշրջանի այլեւ աշխարհի համաչափ զարգացման դեպ մարտահրավեր է: Ադրբեջանական իշխանությունների այդ քայլը դատապարտելի է»,- ասաց ՀԳՄ նախագահը:
Նրա խոսքով` Ադրբեջանի իշխանությունների անհանդուժողականությունը քաղաքական հետապնդում է: «Անկախ նրանից թե որքան էլ Ադրբեջանի գրողների միությունը փորձի քաղաքակիրթ ձեւով լուծել այս հարցը` կարծես ոչ մի «կոշտ» բան չի անում ինչը բնորոշ է իրենց»,- նշեց Անանյանը: Նա շեշտեց, որ սա առաջին դեպքը չէ, երբ ադրբեջանական իշխանությունները անհանդուժողականություն են ցուցաբերում գրողների նկատմամբ: «Ղարաբաղում 2012-ին կազմակերպված գրողների պոեզիայի միջազգային փառատոնին, որին մասնակցում էր նաեւ վրաց բանաստեղծուհի Մաղվալա Գոնաշվիլին, նրանք իրեն «պերսոնա նոն գրատա» ճանաչեցին` մասնակցելու համարձակություն ունենալու համար»,- ասաց գրողը` շեշտելով, որ կատարվածը եւս վկայում է այն մասին, որ գրական «շրջափակումը», գրականութունը քաղաքականացնելը ոչ մի լավ արդյունքի չի կարող հանգեցնել: «Նա չի վախենում ասել ճշմարտությունը եւ ես գիտեմ, որ այսօր որքան էլ փորձեն նրան մեկուսացնել, կանցնեն տարիներ եւ նա նրա խիզախությունը կգնահատվի», ասաց Անանյանը: ՀԳՄ նախագահը` տեղեկացրեց նաեւ, որ պատրաստվում էր բաց նամակ գրել Ադրբեջանի գրողների միության նախագահին, սակայն հետագայում մտափոխվել է` չցանկանալով վնասել Աքրամ Այլիսլիին:
Արձակագիր-թագմանիչ Արտակ Վարդանյանը, ով նույնպես ծնունդով Նախիջեւանից է, ձեռնամուխ է եղել «Քարե երազներ» գրքի թարգմանությանը:
Փետրվարի 7 –ին Ադրբեջանի նախագահ Իլհամ Ալիեւը հրամանագիր է ստորագրել Ադրբեջանում հայկական ջարդերի մասին «Քարե երազներ» գրքի հեղինակ Աքրամ Այլիսլիին «Ժողովրդական գրող» կոչումից եւ անհատական նախագահական կենսաթոշակից զրկելու մասին: Քարե երազներ» վեպում, որն անցյալ դեկտեմբերին հրապարակվել է ռուսաստանյան «Դրուժբա նարոդով» հանդեսում, Աքրամ Այլիսլին ականատեսների աչքերով հանգամանորեն պատմում է անցյալ դարասկզբին Ագուլիսում եւ 1988-90-ականներին Սումգայիթում եւ Բաքվում հայկական ջարդեր իրագործած ադրբեջանցիների վայրագությունների մասին: Այլիսլիի դեմ Ադրբեջանի իշխանությունների հրահրած զանգվածային հետապնդումների իրական պատճառն այն է, որ նա վեպում ակնարկել է իշխանության գալու նպատակով Սումգայիթում հայկական ջարդերը Հեյդար Ալիեւի կողմից հրահրված լինելու մասին: Գրողը դիմել է Ադրբեջանում ԱՄՆ-ի, Մեծ Բրիտանիայի, Գերմանիայի, Ֆրանսիայի, Ռուսաստանի, Նորվեգիայի, Շվեդիայի, Շվեյցարիայի, Ավստրիայի, Նիդերլանդների, Բելգիայի եւ այլ երկրների դեսպանատներին, ինչպես նաեւ Եվրամիության, ԵԱՀԿ-ի եւ Եվրոպայի Խորհրդի ներկայացուցչություններին` խնդրելով ծանոթանալ իր վեպին եւ վերաբերմունք արտահայտել նրա նկատմամբ: «Թուրան»-ի հետ զրույցում Այլիսլին ափսոսանք է հայտնել իրեն «Ժողովրդական գրող» կոչումից եւ նախագահական կենսաթոշակից զրկելու մասին Ալիեւի կողմից հրամանագիր ստորագրվելու կապակցությամբ: