367.12
«Սահման»-ը Լուվրում յուրահատուկ ցուցադրություն եւ ջերմ ընդունելություն է ունեցել
2 րոպեի ընթերցում
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Հայ կինոռեժիսոր Հարություն Խաչատրյանի «Սահման» ֆիլմը Լուվրում ջերմ ընդունելության է արժանացել: Հայաստանի ազգային կինոակադեմիայի նախագահ, կինոգետ Դավիթ Մուրադյանը եւս ներկա է եղել հայկական կինոյի պատմություն համար առանցքային կարեւորություն ունեցեղ այս իրադարձությանը:
Ինչպես «Արմենպրես»-ի հետ զրույցում նշեցին «Ոսկե ծիրան» կինոփառատոնի հիմնադրամից, այն հանգամանքը, որ Լուվրն իր կինոցուցադրությունների դահլիճը տրամադրում է հայկական ֆիլմին, արդեն իսկ շահեկան է մեր երկրի համար. «Լուվրը համաշխարհային «խաչմերուկ է ոչ միայն այն իմաստով, որ այնտեղ հավաքված է համաշխարհային արվեստի մեծ հարստություն, այլև այցելուների առումով, այստեղ ցուցադրված կինոն ստանում է միջազգային հնչողություն»:
Հարություն Խաչատրյանի «Սահման» ֆիլմը բավականին յուրօրինակ ձեւով է մատուցվել Լուվրում:
Անվանի կինոռեժիսոր Աբաս Քիառոստամին այդ օրերին անցկացրել է իր ֆիլմերի ցուցադրությունը: Ծրագրի կազմակերպիչները Քիառոստամիին առաջարկել էին ցուցադրության համար ընտրել իր ֆիլմերից երկուսը եւ եւս մեկը` համաշխարհային կինոյից: Քիառոստամին ասել է, որ համաշխարհային կինոյից ընտրություն կատարելն իր համար շատ պարզ էր, եւ որ ին ընտրածը Հարություն Խաչատրյանի «Սահման»-ն էր, որն առաջին իսկ դիտումից փոխել է աշխարհի հանդեպ իր վերաբերմունքը, իսկ հիմնական դժվարությունն ինքն ունեցել է սեփական ֆիլմերի ընտրության հարցում:
Ցուցադրությանը հայեր նույնպես եղել են, բայց գերակշիռ մասն` այլ ազգերի ներկայացուցիչներ:
Բաժանորդագրվեք մեր ալիքին Telegram-ում