388.16
Շվեյցարացի խորհրդարանականը շնորհակալ է Ադրբեջանին`ԼՂՀ այցելելուց հետո իրեն «սեւ ցուցակում» ընդգրկելու համար
4 րոպեի ընթերցում
ԵՐԵՎԱՆ, ՀՈԿՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղում տիրող իրավիճակին աշխարհում շատ քիչ են ծանոթ: «Արմենպրես»-ի հաղորդմամբ` Հայաստան-Շվեյցարիա խորհրդարանական խմբի համանախագահ Ուելի Լոյենբերգերը հոկտեմբերի 5-ին լրագրողների հետ հանդիպմանը նշեց, որ իրենց պատվիրակության` ԼՂՀ այցելության նպատակը նաեւ իրավիճակին անձամբ ծանոթանալն էր, քանի որ այս պարագայում իրենց խոսքն ավելի ծանրակշիռ կլինի: Լրագրողների դիտարկմանը, թե ԼՂ քաղաքացին չի կարող հանգիստ խղճով ապրել Ադրբեջանում, ուր մարդասպանն ազատ է արձակվում եւ հերոսացվում, Լոյենբերգերը համաձայնեց: Այլ մեկնաբանություններից զերծ մնալով` ասաց, թեկարելի է նման միտք արտահայտել: «Ես համոզված եմ, որ այս քննարկումը միջազգային մակարդակով դեռ կընթանա»,- նշեց նա:
Հայաստան-Շվեյցարիա խորհրդարանական խմբի համանախագահ Դոմինիկ դը Բյումանի փոխանցմամբ` ողջ աշխարհի պատմության մեջ հատկապես յուրաքանչյուր կոնֆլիկտից հետո, կարելի է ասել, որ գործադիր իշխանությունները որոշում են կայացրել ժողովրդի ճակատագրի վերաբերյալ եւ գծել են սահմանները գրեթե երբեք հաշվի չառնելով տվյալ ժողովուրդների ձգտումները: «Վստահ եմ` ԼՂՀ օրինակը դրանցից մեկն է, որի պարագայում աշխարհը դեռ առաջընթացի պիտի գնա, որի ժամանակ կոնֆլիկտի կողմ բոլոր իշխանությունները շատ ավելի համեստ պիտի իրենց պահեն` ժողովրդի ընդհանուր շահը զուտ ռազմավարական շահերին գերադասելով»,- ասաց նա: Բանախոսը նկատեց, որ իրենք չեն փորձում դաս տալ կամ միջամտել այս կամ այն երկրի ներքին քաղաքականությանը:
Բանախոսներն անդրադարձան նաեւ ադրբեջանական իշխանությունների կողմից կիրառվող պրակտիկային, որով ԼՂՀ այցելող օտարերկրյա պաշտոնյաները հայտարարվում են անցանկալի անձ:«Մենք Հայաստանի հյուրերն ենք եւ ներկայացնում ենք մի երկիր, որ աշխարհին հայտնի է իր չեզոքությամբ: Մենք մեզ իրավունք չենք վերապահում միջամտել որեւէ ժողովրդի կամ երկրի ներքին գործերին: Այդ զսպվածությունը, որ ես արտահայտում եմ, պայմանավորված է այն դերով, որ Շվեյցարիան մտադիր է խաղալ ի շահ ողջ Կովկասի` շնորհիվ այն վստահության, որ կովկասյան ցանկացած երկիր տածում է մեր իշխանությունների նկատմամբ»,- նշեց բանախոսը:
Շվեյցարացի խորհրդարանականը հարցին նաեւ հումորային պատասխան տվեց: Նա նշեց, որ տարիքից ելնելով` չի կարող շրջագայել աշխարհի բոլոր երկրներով, եւ ենթադրում է, որ այժմ, այցելելով ԼՂՀ, դարձավ սեւ ցուցակի անդամներից մեկը: «Քանի որ հանդիսանում եմ Զբոսաշրջության շվեյցարական ֆեդերացիայի նախագահը, հայտնվելով այդ ցուցակում, շնորհակալություն եմ հայտնում ադրբեջանական իշխանություններին, որ փոքր-ինչ հեշտացրին իմ երթուղիների ընտրությունը»,- ասաց դը Բյումանը:
Նա տեղեկացրեց, որ ի սկզբանե գիտեին` Ադրբեջանը չի ցանկանում, որ իրենք մեկնեն ԼՂՀ. այդ մասին գրվել է մամուլում, Ադրբեջանն անգամ մեր կառավարությանն է դիմել, շվեյցարական ԱԳՆ-ն դիվանագիտական նկատառումներով նույնպես չի ցանկացել, որ իրենք մեկնեն: Դիրքորոշումը, բանախոսի փոխանցմամբ, ինչ-որ առումով հասկանալի էր, սակայն իրենք խորհրդարանականներ են, ոչ թե դիվանագետներ, ուստի եթե ուզում են տիրող իրավիճակի մասին ճիշտ կարծիք կազմել, այդ այցելությունը խիստ կարեւոր նշանակություն ուներ: Բանախոսները կարծիք հայտնեցին, որ իրավիճակը կփոխվի, երբ Ադրբեջանի ժողովուրդը եւս կարողանա ապրել ժողովրդավարական համակարգում եւ երբ տարածաշրջանը կարողանա խաղաղ ապրել:
