ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Իրանի թիվ մեկ դաշնակիցըՄերձավոր ԱրեւելքումՍիրիան է, եւ ակնհայտ է Բաշար ալ Ասադի եւ Իրանի ղեկավարության միջեւ ձեւավորվել է սերտ համագործակցությունը:
«Արմենպրես»-ի հետ զրույցում նման տեսակետ հայտնեց իրանագետ Գոհար Իսկանդարյանը` անդրադառնալով Սիրիայի շուրջ ծավալվող իրադարձություններում Իրանի ունեցած դերակատարությանը:
«Իրանի ղեկավարությունը քաջ գիտակցում է, որ, իշխանությունից հեռացնելով Բաշար ալ Ասադին, արտաքին ուժերն ամեն ինչ կանեն իրենց առավել հնազանդ քաղաքական գործիչ իշխանության բերելու համար, ով ամեն կերպ կհամագործակցի Արեւմուտքի հետ` խզելով հարաբերությունները կամ թուլացնելով շփման մակարդակը Իրանի հետ: Իրանը գիտի, որ Սիրիայում Բաշար ալ Ասադին տապալելուց հետո ամպերը կուտակվելու են իր երկրի գլխին»,- նշեց իրանագետը: Խոսելով Թուրքիայում այդ երկրի հասցեին առաջին անգամ Իրանի արտաքին գործերի նախարարի ակնհայտ քննադատության մասին, որը վերաբերում էր Թուրքիայի քաղաքականությանը Սիրիայի հարցում, Իսկանդարյանը նշեց, որ ինչքան էլ վերջին տարիներին Թուրքիան փորձում էր տարածաշրջանում անկախ «խաղացողի» դերում հանդես գալ, Սիրիայում տեղի ունեցող վերջին իրադարձությունները պարզորոշ ցույց տվեցին, որ Թուրքիան, այնուամենայնիվ, եղել եւ մնում է ԱՄՆ-ի հիմնական հենակետն ու կամակատարը:
«Կարծում եմ` սրանով Թուրքիան նվազեցրեց իր շանսերըտարածաշրջանի առաջնորդ երկիր լինելու հարցում: Միեւնույն ժամանակ նկատվում են այդ հարթության վրա Իրանի դերի բարձրացման միտումներ»,-նշեց իրանագետը:
Մարդու իրավունքների հետազոտության սիրիական կենտրոնի տվյալներով` այդ երկրում 2011թ-ի մարտ ամսից շարունակվող բախումների հետեւանքով զոհվել է շուրջ 19 հազար մարդ: Համաձայն արաբական լրատվամիջոցների` զոհվածների թվում շուրջ 12 հազար խաղաղ քաղաքացիներ են, իսկ ավելի քան 5 հազարը`անվտանգության աշխատակիցներ: