ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: ԵԱՀԿ Մինսկի խմբի համանախագահների տարածաշրջանային այցի ընթացքում արված հայտարարություններում եւ մեկնաբանություններում ղարաբաղյան կողմի համար որեւէ նորություն չկար: «Արմենպրես»-ի հետ զրույցում այս մասին նշեց Լեռնային Ղարաբաղի Հանրապետության Ազգային ժողովի արտաքին հարցերի մշտական հանձնաժողովի նախագահ Վահրամ Աթանեսյանը: Նա համարում է, որ տարածաշրջան համանախագահների այցն առօրյա, դիվանագիտական աշխատանքի շարքից էր` նկատի ունենալով, որ ՌԴ համանախագահը հայտարարել է, որ իրենց համար սկսում է ամառային արձակուրդը:
«Ադրբեջանը համառորեն պնդում է, թե համանախագահները տարածաշրջան են այցելել` նախապատրաստելու Հայաստանի եւ Ադրբեջանի նախագահների հանդիպումը, որը, եթե հավատալու լինենք ադրբեջանական կողմին, սպասվում է աշնան սկզբին, եւ այդ հանդիպման մոդերատորը կարող է լինել ԱՄՆ պետքարտուղար Հիլարի Քլինթոնը: Եթե այդ տեղեկատվության մեջ ճշմարտության հատիկ կա, կարելի է կարծել, որ համանախագահների այցը նորություն էր»,-նկատեց Աթանեսյանը: Այդուհանդերձ, նախագահների հանդիպման կազմակերպման մասին համանախագահներն իրենց տարածաշրջանային այցի ընթացքում չեն խոսել:
«Ամեն դեպքում հակված եմ ենթադրելու, որ տարածաշրջանային գործընթացները նրանք պահում են իրենց ուշադրության կենտրոնում: Ինչ վերաբերում է համանախագահների կողմից արված այն հայտարարությանը, որ ԼՂ-ն կդառնա բանակցային գործընթացի մասնակիցը, ապա երբ նրանք գտնվում էին Ստեփանակերտում, Արցախի նախագահ Բակո Սահակյանն իր հերթին եւս մեկ անգամ միանշանակորեն նշել է, որ Լեռնային Ղարաբաղի մասնակցությունըբանակցային գործընթացումպետք է ապահովվի»,-ասաց Աթանեսյանը: Նրա համոզմամբ` նախագահի կողմից դա պատահական հայտարարություն չէր, եւ շահգրգռված լինելով բանակցությունների դինամիկայի պահպանմամբ ու որոշակի առաջընթացով` համանախագահները հնարավորություն կփնտրեն, որ ԼՂ-ն լիարժեքորեն ներգրավվի կարգավորման բանակցային գործընթացում:
ԵԱՀԿ գլխավոր քարտուղար ԼամբերտոԶաննիերը հուլիսի 11-ին այցելել է Հայաստան, նույն օրը ԵԱՀԿ Մինսկի խմբի համանախագահներ Ռոբերտ Բրադկեն (ԱՄՆ), Ժակ Ֆորը (Ֆրանսիա), Իգոր Պոպովը (Ռուսաստան) եւ ԵԱՀԿ գործող նախագահի անձնական ներկայացուցիչ Անջեյ Կասպրշիկը ականազերծված տարածքով հատել են Լեռնային Ղարաբաղի և Ադրբեջանի շփման գիծն ու այցելել Ստեփանակերտ, այնուհետև Երևան: