1 րոպեի ընթերցում
ԵՐԵՎԱՆ, 7 ՄԱՐՏԻ, ԱՐՄԵՆՊՐԵՍ: Ֆրանսիայի նախագահ Նիկոլա Սարկոզին հայ համայնքի հետ մարտի 7-ի հանդիպմանը կներկայացնի մինչեւ իր նախագահության ավարտը Ցեղասպանությունների ժխտումը քրեականացնող նոր օրինագիծ չներկայացնելու պատճառները: «Արմենպրես»-ի հետ զրույցում ՀՅԴ Ֆրանսիայի հայ դատի գրասենյակի տնօրեն Հրաչ Վարժապետյանը նշեց, որ հայ համայնքը ներկայացնող պատվիրակությունը, որը ներառում է քաղաքական բոլոր հոսանքները, ցանկանում է հասկանալ, թե ինչու է նոր օրինագիծը ներկայացվելու նախագահական ընտրություններից հետո:
«Հանդիպման ժամանակ նախագահը ներկայացնելու է իր պատճառաբանությունը, ինչպես նաեւ իր տեսակետը վերջին երկու ամիսների ընթացքում օրենքի քննարկման վերաբերյալ: Ակնկալիքները ամենեւին էլ մեծ չեն»,-ասաց Վարժապետյանը: Նա նշեց, որ հայ համայնքը դժգոհ է Հայաստանում Սարկոզիի տված խոստումը չկատարելու կապակցությամբ, քանի որ հույս ունեին մինչեւ նրա նախագահության ավարտը նոր օրինագիծ տեսնել: