Պատրիկ Դևեջյանը կարծում է` Ֆրանսիայի Սահմանադրական խորհուրդը ժխտողականությունը հավասարեցնում է սովորական կարծիքի
1 րոպեի ընթերցում
![Պատրիկ Դևեջյանը կարծում է` Ֆրանսիայի Սահմանադրական խորհուրդը ժխտողականությունը հավասարեցնում է սովորական կարծիքի](http://armenpress.am/resized/480/static/news/b/2012/02/682105.jpg)
ԵՐԵՎԱՆ, 29 ՓԵՏՐՎԱՐԻ, ԱՐՄԵՆՊՐԵՍ: Ֆրանսիայի Սահմանադրական խորհրդի որոշումը պետք է հարգվի, սակայն այն քննադատելը ևս արգելված չէ: Ինչպես փոխանցում է «Արմենպրես»-ը` վկայակոչելով Nouvelles d’Armenie-ն, այս մասին իր վերլուծության մեջ նշում է Ֆրանսիայի Ազգային ժողովի պատգամավոր, իշխող Միություն հանուն ժողովրդական շարժման ներկայացուցիչ Պատրիկ Դևեջյանը:
«Սահմանադրական խորհրդին քննադատելիս ես օգտվում եմ հենց նույն խոսքի ազատությունից, որով պատճառաբանվում է տվյալ որոշումը»,- գրում է պատգամավորը:
Դևեջյանը պնդում է, որ, նման թերի որոշում ընդունելով, Սահմանադրական խորհուրդը ժխտողականությունը դարձնում է սովորական կարծիք: Հավական է նաև, որ խորհուրդը ցանկանում էր ցույց տալ, թե Ֆրանսիայի հինգերորդ հանրապետությունում դեռ գործում ենիշխանության թևերի միջև զսպումների և հակակշիռների մեխանիզմները: Սակայն, իրականում, Դևեջյանը կարծում է, որ այդ մեխանիզմներն այլևս չեն գործում և հնացած են:
«Օտար պետության կողմից ժխտողականության քարոզչությունը և հայկական ծագմամբ Ֆրանսիայի քաղաքացիներին վիրավորելն այսուհետ թույլատրելի դարձավ հենց երկրի Սահմանդրական խորհրդի կողմից»,- եզրափակում է հայկական ծագումով ֆրանսիացի պատգամավորը: