2 րոպեի ընթերցում
ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: Հայկական ատոմային էլեկտրակայանի անվտանգության ապահովումը ՀՀ էներգետիկայի եւ բնական պաշարների նախարարության այս տարվա գերակայություններից է: Ինչպես հաղորդում է «Արմենպրես»-ը, այս մասին փետրվարի 16-ին լրագրողների հետ հանդիպման ժամանակ նշեց ՀՀ էներգետիկայի եւ բնական պաշարների նախարար Արմեն Մովսիսյանը:
Հայաստանի կառավարության խնդրանքով` ճապոնական «Ֆուկուսիմա» ատոմակայանում տեղի ունեցած վթարից մի քանի ամիս անց Ատոմային էներգիայի միջազգային գործակալության փորձագետների միջազգային խումբը նախորդ տարի իրականացրել է շահագործման անվտանգության մանրամասն ստուգում: Խումբը ներկայացրել է հանձնարարականներ եւ առաջարկներ այն ուղղություների վերաբերյալ, որտեղ հնարավոր է հայկական ԱԷԿ-ի շահագործման անվտանգության բարելավում:
Եվրամիության որոշմամբ` իր տարածքում շահագործվող բոլոր ատոմակայանները պետք է անցնեն սթրես-թեստ, որը միջուկային էներգաբլոկների անվտանգության ապահովման գնահատումն է արտակարգ իրավիճակներում:
«Այս առումով մեր գերակա խնդիրն է 2012 թվականին կազմակերպել Մեծամորի ատոմակայանի 2-րդ էներգաբլոկի շահագործման սթրես-թեստը, որը կարեւորագույն խնդիր է ինչպես ատոմակայանի, այնպես էլ Հայաստանի Հանրապետության անվտանգության համար»,- ասաց նախարարը: