Հայաստանի եվրաինտեգրման նպատակով կտրամադրվի շուրջ 230 մլն դրամ
1 րոպեի ընթերցում
![Հայաստանի եվրաինտեգրման նպատակով կտրամադրվի շուրջ 230 մլն դրամ](http://armenpress.am/resized/480/static/news/b/2011/11/667830.jpg)
ԵՐԵՎԱՆ, 3 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի եվրաինտեգրման նպատակով 2012թվականին պետական բյուջեից նախատեսվում է տրամադրել է 229 մլն դրամ: Այսօր այս մասին Ազգային ժողովում բյուջետային քննարկումների ժամանակ նշեց ՀՀ Ազգային ժողովի եվրաինտեգրման հարցերի մշտական հանձնաժողովի նախագահ Նաիրա Զոհրաբյանը:
Միջոցները կուղղվեն ԵՊՀ եվրոպական ինտեգրման կենտրոնի, Բեռլինի հայագիտական կենտրոնի, Բուխարեստի համալսարանում հայագիտական ամբիոնի պահպանմանը: Ն.Զոհրաբյանի խոսքով' Հայաստանի եվրաինտեգրման նպատակով իրականացվելիք ծախսերը, նախորդ տարվա համեմատ, հիմնականում կպահպանվեն:
«Մեզ համար շատ կարեւոր է, որ եվրոպական լրջագույն համալսարանների հայագիտական կենտրոններին ուշադրություն է դարձվում: Մենք պետք է հետամուտ լինենք, որ այն համալսարաններին, որտեղ եւս հայագիտական կենտրոններ կան, հատկացումներ արվեն»,- ասաց նա:
Նաիրա Զոհրաբյանը նաեւ մտահոգություն հայտնեց քարոզչության նպատակներով տրամադրվող գումարների առնչությամբ' նշելով, որ դրանք բավարար չեն: