Ըստ Ն. Զոհրաբյանի` վարչապետի մամուլի քարտուղարի պարզաբանումը «չարչարանաց ուրբաթի» պատասխանն էր
2 րոպեի ընթերցում
![Ըստ Ն. Զոհրաբյանի` վարչապետի մամուլի քարտուղարի պարզաբանումը «չարչարանաց ուրբաթի» պատասխանն էր](http://armenpress.am/resized/480/static/news/b/2011/10/667220.jpg)
ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: Ես հասկանում եմ, որ դա բոլորին հետաքրքրող թեմաներից մեկն է: Այսօր Ազգային ժողովում կայացած ճեպազրույցների ժամանակ այսպես արձագանքեց ԲՀկ խմբակցության պատգամավոր Նաիրա Զոհրաբյանը այն հարցին, թե արդյոք ԲՀԿ-ն ընդունել է որպես ազդակ ՀՀ վարչապետ Տիգրան Սարգսյանի այն հայտարարությունը, թե ովքեր չհամագործակցեն ՀՀԿ-ի հետ, կհայտնվեն կոտրած տաշտակի առջեւ:
Ն. Զոհրաբյանը մեջբերեց հարցի առնչությամբ վարչապետի մամուլի քարտուղար Արամ Անանյանի տված պարզաբանումը, որում մասնավորապես ասվում է .»Շատերն են փորձում նենգափոխել վարչապետի խոսքերը եւ ուղղել դրանք կոալիցիոն գործընկերներին այն դեպքում, երբ խոսքը Հանրապետության նախագահի շուրջ համախմբվելու մասին էր եւ ուղղված էր քաղաքական դաշտի բոլոր այն ուժերին, որոնք երկիրն առաջ մղելու նախաձեռնություններում համագործակցելու փոխարեն ինքնանպատակ պայքար են ծավալում: ԲՀԿ-ն մեր կոալիցիոն գործընկերն է, եւ հարկ չկա հորինվածքներ շրջանառել մի բան մասին, որը ոչ միայն անհեթեթ է, այլեւ ուղղակի սուտ է»:
«Սրանով ամեն ինչ ասված է: Իմ ռեպլիկն ունեմ մամուլում այսօր շրջանառվող հոդվածների, «չարչարանաց չորեքշաբթիների եւ հինգշաբթիների» թեմաներով գրել սիրող լրագրողներին. սա էլ նրանց համար «չարչարանաց ուրբաթի» պատասխանն էր»: Կարծում եմ' ես տվեցի եւս մի 10 հոդված գրելու թեմա»,- եզրափակեց Ն.Զոհրաբյանը: