Էդուարդ Շարմազանով. «Նրանք պետք երկնքից նայեն ու տեսնեն` Հայաստանը գնում է ճիշտ ուղղությամբ»
2 րոպեի ընթերցում
![Էդուարդ Շարմազանով. «Նրանք պետք երկնքից նայեն ու տեսնեն` Հայաստանը գնում է ճիշտ ուղղությամբ»](http://armenpress.am/resized/480/static/news/b/2011/10/667156.jpg)
ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: Հոկտեմբերի 27-ի ոճրագործությունը մեր նորագույն պատմության ցավալի էջերից է. գնդակահարվեցին ՀՀ վարչապետը, ԱԺ նախագահը, պատգամավորներ: «Արմենպրես»-ի հետ զրույցում ՀՀ ԱԺ ՀՀԿ խմբակցության քարտուղար Էդուարդ Շարմազանովը նշեց. «Պետք է վառ պահենք ոճրագործության զոհերի հիշատակը, եւ մեր աշխատանքով այնպես անենք, որ նրանք երկնքից նայեն եւ տեսնեն` Հայաստանը գնում է ճիշտ ուղղությամբ: Ամեն ինչ պետք է անել, որ էքստրեմիզմը, անհանդուրժողականությունը, նմանատիպ ահաբեկչությունները մեզ մոտ տեղ չունենան»: ՀՀ ԱԺ ՀՀԿ խմբակցության քարտուղարը հույս հայտնեց, որ որեւէ երկիր նման ահաբեկչության միջով չի անցնի:
«Առհասարակ,եթե հայը հայի վրա եթե ձեռք է բարձրացնում, ստահակություն է: Դժբախտաբար, ստահակներ դեռեւս կան: Մեր կուսակցության համար դա ավելի մեծ ցավ է, որովհետեւ սպանվեցին նրա առաջնորդը` Վազգեն Սարգսյանը, կուսակից ընկերներ` Յուրի Բախշյանը, Արմենակ Արմենակյանը եւ այլք»,-ասաց խմբակցության քարտուղարը` հավելելով, որ չի ուզում կուսակցական բաժանում կատարել. բոլոր նրանք, ովքեր զոհվել են հոկտեմբերի 27-ին, լուրջ ներդրում ունեին մեր իրականության կայացման գործում:
Տասներկու տարի առաջ այս օրը` 1999 թ. հոկտեմբերի 27-ին, ՀՀ Ազգային ժողովում տեղի ունեցած ահաբեկչությանը զոհ գնացին 8 պետական գործիչներ` ՀՀ վարչապետ Վազգեն Սարգսյանը, ԱԺ նախագահ Կարեն Դեմիրճյանը, փոխխոսնակներ Յուրի Բախշյանն ու Ռուբեն Միրոյանը, Օպերատիվ հարցերի նախարար Լեոնարդ Պետրոսյանը, պատգամավորներ Արմենակ Արմենակյանը, Հենրիկ Աբրահամյանը եւ Միքայել Քոթանյանը