Բացասական ջերմաստիճան առայժմ սպասվում է միայն լեռնային շրջաններում
1 րոպեի ընթերցում
![Բացասական ջերմաստիճան առայժմ սպասվում է միայն լեռնային շրջաններում](http://armenpress.am/resized/480/static/news/b/2011/10/666393.jpg)
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Այսօր եւ վաղը հանրապետության զգալի մասերում սպասվում են տեղումներ, լեռնային շրջաններում' ձնախառն անձրեւի տեսքով: Այս մասին «Արմենպրես»-ի հետ զրույցում նշեց ԱԻՆ «Հայպետհիդրոմետ» ծառայության օդերեւութաբանական կանխատեսումների բաժնի պետ Գագիկ Սուրենյանը: «Առանձին վայրերում սպասվում է քամու ուժգնացում' 20-25 մետր վայրկյան արագությամբ: Հյուսիս-արեւմուտքից հանրապետություն են ներթափանցում արկտիկական ցուրտ հոսանքներ: Օդի ջերմաստիճանը հանրապետության շրջանների զգալի մասում նվազել է մոտ 7-9 աստիճանով»,-տեղեկացրեց Գ. Սուրենյանը' հավելելով, որ ջերմաստիճանը 6-8 աստիճանով կնվազի հոկտեմբերի 20-ի գիշերը, եւ եւս 1-3 աստիճանով' 21-ի:
Նրա փոխանցմամբ'լեռնային շրջաններում սպասվում է մինչեւ 6-7 աստիճան ցուրտ, Արարատյան դաշտում 1-2, Տավուշի, Սյունիքի հովիտներում' մինչեւ 3-4 աստիճան տաքություն: «Բացասական ջերմաստիճան սպասվում է միայն լեռնային շրջաններում: Ջերմաստիճանը կբարձրանա 2-3 աստիճանով միայն հոկտեմբերի 22-ին: Սակայն դիտվող ջերմաստիճանն այսուհետ անհամեմատ ցածր կլինի»,- նշեց Գ.Սուրենյանը: