Վ. Գաբրիելյան. «Ակցիզային հարկի բարձրացումը չի նշանակում հարկադրույքի բարձրացում»
2 րոպեի ընթերցում
![Վ. Գաբրիելյան. «Ակցիզային հարկի բարձրացումը չի նշանակում հարկադրույքի բարձրացում»](http://armenpress.am/resized/480/static/news/b/2011/10/666274.jpg)
ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ: ՀայաստանիՀանրապետության կառավարությունը դեռեւս քննարկում է հարկային փոփոխությունների նոր փաթեթը: Ինչպես լրագրողների հետ հանդիպման ժամանակ այսօր նշեց ՀՀ ֆինանսների նախարար Վաչե Գաբրիելյանը, դրանում առկա են եւ հարկային բեռի մեծացման, եւ ստվերի կրճատման հաշվին հարկային հավաքագրումների ավելացման հնարավորություններ:
Խոսելով հարկային բարեփոխումների փաթեթից' Վ. Գաբրիելյանը տեղեկացրեց, որ կվերանայվեն ակցիզային դրույքները:
«Մենք ունեցել ենք առանձնահատուկ ակցիզներ, երբ ապրանքի գինը եղել է 100 միավոր, իսկ ակցիզինը' 10 միավոր: 2012թ-ին, երբ ապրանքի գինը 180 միավոր է, ակցիզի չափը մնացել է 10 միավոր: Եթե այդ ակցիզային հարկը բարձրացնենք, դա չի նշանակի հարկադրույքի բարձրացում: Այն տնտեսական իրականության հետ ճշգրտում է նշանակում»,- ասաց նախարարը: Նրա հավաստմամբ' Ազգային ժողովում շրջանառության մեջ գտնվող հանքարդյունաբերության մեջ հարկային ռեժիմի փոփոխության վերաբերյալ օրինագիծը նույնպես կարելի է հարկային նոր փաթեթի մաս համարել:
«Մենք կիրառելու ենք մի ռեժիմ, որն առավել համահունչ է միջազգային տնտեսական փորձին եւ որն ապահովում է ոչ միայն բարձր եկամուտներ, այլեւ խրախուսում է օտարերկրյա ներդրումների մուտքը Հայաստան»,- նշեց Վ. Գաբրիելյանը: