Շ. Քոչարյան. «Բաքուն պետք է բացատրություններ տա սեփական ժողովրդին`ուր են գնացել իբր բանակի զինմանն ուղղված միլիարդները»
1 րոպեի ընթերցում
![Շ. Քոչարյան. «Բաքուն պետք է բացատրություններ տա սեփական ժողովրդին`ուր են գնացել իբր բանակի զինմանն ուղղված միլիարդները»](http://armenpress.am/resized/480/static/news/b/2011/10/666000.jpg)
ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: «Ադրբեջանի կեղծավոր ողբը Լեռնային Ղարաբաղի դեմ իր սանձազերծած ագրեսիայի հետեւանքների վերաբերյալ նորություն չէ: Նորություն է լացակումած ագրեսիվությունից Ադրբեջանի ղեկավարության անցումն ագրեսիվ լացակումածությանը: Եւ սա օրինաչափ է, քանի որ Բաքուն պետք է բացատրություններ տա սեփական ժողովրդին, թե ուր են գնացել բոլոր ամբիոններից անընդհատ թմբկահարվող միլիարդները, որոնք իբր ուղղվում էին բանակի զինմանը, եւ թե ինչու բանակցություններում ուժային շանտաժի քաղաքականությունը տապալվեց»,- այսօր հայտարարել է Հայաստանի արտաքին գործերի փոխնախարար Շավարշ Քոչարյանը' մեկնաբանելով վերջին օրերին հաճախակիացած Ադրբեջանի բարձրաստիճան պաշտոնյաների հայտարարությունները Հայաստանի եւ Արցախի ռազմական հզորությամբ իրենց մտահոգվածության վերաբերյալ, որոնք միաժամանակ, ուղեկցվում են ուժի կիրառման անթաքույց սպառնալիքներով:
«Օրինաչափ է նաեւ այն, որ անհեռատեսորեն բոլորին, ամեն ինչ եւ ամենուրեք քննադատող Ադրբեջանի ժառանգական ռեժիմն այժմ գտնվում է փակուղում' դեմ առ դեմ սեփական ժողովրդի առջեւ»,- ասված է Շ. Քոչարյանի' «Արմենպրես»-ին տրամադրած հաղորդագրության մեջ: