Ոստիկանների միջազգային ասոցիացիային Հայաստանի անդամակցության հարցը հիստերիա է առաջացրել Թուրքիայում
2 րոպեի ընթերցում
![Ոստիկանների միջազգային ասոցիացիային Հայաստանի անդամակցության հարցը հիստերիա է առաջացրել Թուրքիայում](http://armenpress.am/resized/480/static/news/b/2011/10/665951.jpg)
ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ:2012թ. սեպտեմբերի 2-9 Իսրայելում կայանալիք Ոստիկանների միջազգային ասոցիացիայի գագաթաժողովում Հայաստանի լիիրավ անդամակցության հարցը հիստերիա է առաջացրել Թուրքիայում: Ինչպես այսօր լրագրողների հետ հանդիպման ժամանակ ասաց Ասոցիացիայի հայաստանյան մասնաճյուղի նախագահ, ոստիկանության գնդապետ Գրիշա Սարգսյանը, չնայած Թուրքիայի ագրեսիվ պահվածքի' Հայաստանին սատարել են ԱՄՆ-ի, Ֆրանսիայի ու Իսրայելի ասոցիացիաների ղեկավարները:
Գ. Սարգսյանը փոխանցեց Իսրայելի ոստիկանական ասոցիացիայի ղեկավարի խոսքը, ով հայտարարել է, որ եթե թուրքերն այդքան վրդովված են, ապա կարող են հաջորդ տարի ժամանել Իսրայել ու անձամբ դեմ քվեարկել Հայաստանին: Նշենք, որ Թուրքիան հայտարարել է' Հայաստանը թշնամի երկիր է, եւ իրենք գրավոր զեկույց կներկայացնեն Իսրայելի գագաթնաժողովին չմասնակցելու վերաբերյալ:
Ըստ գնդապետի' Ոստիկանների միջազգային ասոցիացիային Հայաստանի անդամակցումը նաեւ թույլ կտա իրավական աջակցություն ցույց տալ Հայաստանի քաղաքացիներին այն երկրներում, որոնց հետ մենք դիվանագիտական հարաբերություններ չունենք: «Սա լավ հնարավորություն է նաեւ Հայաստանն այլ երկրներին ճանաչելի դարձնելու համար: Հայաստանը դիվանագիտական հարաբերություններ ունի 63 անդամ պետություններից միայն 24-ի հետ»,- նշեց Գ. Սարգսյանը: