Դ.Հարությունյան. «ԼՂ հարցով ԵԽԽՎ ենթահանձնաժողովը չի կարող կյանքի կոչել իր առջեւ դրած խնդիրները»
2 րոպեի ընթերցում
![Դ.Հարությունյան. «ԼՂ հարցով ԵԽԽՎ ենթահանձնաժողովը չի կարող կյանքի կոչել իր առջեւ դրած խնդիրները»](http://armenpress.am/resized/480/static/news/b/2011/10/665606.jpg)
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի հարցով ԵԽԽՎ ենթահանձնաժողովը չի կարող կյանքի կոչել իր առջեւ դրած խնդիրները: Այսօր լրագրողների հետ հանդիպման ժամանակ այս մասին նշեց ԵԽԽՎ-ում հայկական պատվիրակության ղեկավար Դավիթ Հարությունյանը' ավելացնելով, որ ենթահանձնաժողովի ստեղծումը միտված էր ԵԽԽՎ-ում հայկական եւ ադրբեջանական պատվիրակությունների, ինչպես նաեւ ընդհանուր առմամբ Հայաստանի եւ Ադրբեջանի միջեւ վստահության մթնոլորտի ստեղծմանը, սակայն այդպես էլ չծառայեց իր նպատակին:
«Սա արդեն երկրորդ նստաշրջանն է, որ մենք մորաթորիում ենք հայտարարել փոխադարձ մեղադրանքներին, սակայն այն որեւէ դրական արձանք չստացավ ադրբեջանական պատվիրակության կողմից»,- նշեց Դ.Հարությունյանը:
Նա նաեւ ընդգծեց, որ հայկական պատվիրակությունը չի մասնակցել Լեռնային Ղարաբաղի հարցով ԵԽԽՎ ենթահանձնաժողովի նիստին, ինչն ադրբեջանական պատվիրակությունը փորձել է ներկայացնել որպես ԵԽԽՎ բյուրոյի որոշման չկատարում: «Իսկ ինչպես հասկանանք այն, որ Ադրբեջանն ինքը մերժում է ԵԽԽՎ մոնիթորինգային առաքելության մուտքը սեփական երկիր»,- նշեց հայկական պատվիրակության ղեկավարը:
Դ.Հարությունյանը նաեւ կարծիք հայտնեց, որ ենթահանձնաժողովի գործունեությունը մեծապես կախված է քաղաքական կոնյուկտուրայից: «Մենք սկսում ենք նկատել, որ ԵԽԽՎ-ն դադարում է լինել արժեքների կազմակերպություն եւ վերածվում է շահերի կազմակերպության»,- ընդգծեց Դ.Հարությունյանը: