Դ. Կարապետյան. «Հավանաբար Ադրբեջանին մտահոգում է նախարարների խոսակցության բովանդակությունը»
1 րոպեի ընթերցում
![Դ. Կարապետյան. «Հավանաբար Ադրբեջանին մտահոգում է նախարարների խոսակցության բովանդակությունը»](http://armenpress.am/resized/480/static/news/b/2011/10/665378.jpg)
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ : Զարմանալի է, թե ինչու է ադրբեջանական կողմը խուսափում խոսել Հայաստանի ու Ադրբեջանի պաշտպանության նախարարների Բրյուսելում հոկտեմբերի 6-ին ունեցած կարճատեւ առանձնազրույցի մասին: Ինչպես «Արմենպրես»-ին տեղեկացրին ՀՀ ՊՆ տեղեկատվության եւ հասարակայնության հետ կապերի վարչությունից, այս մասին ասել է ՀՀ պաշտպանության նախարարի մամուլի քարտուղար Դավիթ Կարապետյանը' մեկնաբանելով ադրբեջանական լրատվամիջոցներում տարածված այն տեղեկությունը, թե իբր ՀՀ պաշտպանության նախարար Սեյրան Օհանյանը Բրյուսելում չի հանդիպել Ադրբեջանի պաշտպանության նախարար Սաֆար Աբիեւին :
«Հավանաբար նրանց մտահոգում է այդ խոսակցության բովանդակությունը: Ամեն դեպքում, տեղի ունեցած փաստը դիվանագիտական ոչ բարձրաստիճան պաշտոնյայի միջոցով հերքելն իրականությունը թաքցնելու անհաջող փորձ է»,- նշել է նա: