ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: «Հայաստանի Հանրապետության ցանկացած քաղաքացի իրավունք ունի մուտք գործել քաղաքական դաշտ, սակայն, բնականաբար, Ռոբերտ Քոչարյանը սովորական քաղաքացի չէ եւ ավելի մեծ շանսեր ունի դրա համար»,- այսօր լրագրողների հետ հանդիպման ժամանակ նշեց քաղաքագետ, Կովկասի ինստիտուտի տնօրեն Ալեքսանդր Իսկանդարյանը' մեկնաբանելով ՀՀ երկրորդ նախագահ Ռ.Քոչարյանի երեկվա հայտարարությունը, թե չի բացառում իր' քաղաքականություն վերադառնալու հնարավորությունը:
«Քաղաքական գործիչների վերադարձի համար անհրաժեշտ է երկու պայման' նախ' բավարար էլեկտորատ (չեմ կարծում, որ Ռ. Քոչարյանը բավարարվի 5 ձայնով), եւ երկրորդ' կուսակցական կամ կառուցվածքային բազա, իսկ մինչ այժմ մենք դեռեւս չենք լսել, որ որեւէ քաղաքական ուժ պատրաստ է դառնալ այդ բազան»,- իր վերլուծությունը ներկայացրեց քաղաքագետը: Սակայն, նրա կարծիքով, այս ամենը հայտնի ճշմարտություններ են: «Ես պարոն Քոչարյանից որեւէ նոր բան չեմ լսել»,- ասաց Ա. Իսկանդարյանը:
Միաժամանակ քաղաքագետը հիշեցրեց, որ վերադարձի համար Ռ. Քոչարյանը նշել է հստակ պայմաններ, որոնցից մեկը ճգնաժամի առկայությունն է, ինչը ներկայում չկա:
Անդրադառնալով ներքաղաքական այլ զարգացումների' քաղաքագետը շեշտեց, որ Հայ ազգային կոնգրեսը կրկին որդեգրել է ծայրահեղական հռետորաբանություն' հավաքագրելու համար «ընդդեմ էլեկտորատը»: «Սա ավանդական քայլ է հայկական քաղաքականության մեջ. երբ մոտենում են ընտրությունները, ընդդիմությունը ծայրահեղացնում է իր հռետորաբանությունը»,- կարծիք հայտնեց Ա. Իսկանդարյանը: