Պետությունն աջակցում է փոքր ու միջին ձեռնարկատիրություններին` արտաքին շուկա մուտք գործելու հարցում
1 րոպեի ընթերցում
![Պետությունն աջակցում է փոքր ու միջին ձեռնարկատիրություններին` արտաքին շուկա մուտք գործելու հարցում](http://armenpress.am/resized/480/static/news/b/2011/09/663289.jpg)
ԵՐԵՎԱՆ, 14 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության կառավարությունը Փոքր եւ միջին ձեռնարկատիրությունների զարգացման ազգային կենտրոնին'ՓՄՁ ԶԱԿ-ին, տրամադրելու է միջոցներ' արտահանման գործընթացը խթանելու նպատակով: Ինչպես այսօր' պաշտոնավարման ընթացքում լրագրողների հետ առաջին հանդիպմանն ասաց ՓՄՁ ԶԱԿ գործադիր տնօրեն Տիգրան Հարությունյանը, ՀՀ-ում գերփոքր ձեռնարկատիրության սուբյեկտների կողմից արտադրվող ապրանքների սերտիֆիկացման նպատակով ներմուծվել է պետության կողմից 50 տոկոս փոխհատուցման կարգը: Ըստ Տ. Հարությունյանի' նախագծի նպատակը պետական աջակցության ցուցաբերումն է հանրապետության գերփոքր ձեռնարկատիրության սուբյեկտներին' վերջիններիս արտաքին շուկան հասանելի դարձնելու համար:
Արդեն հավաքագրում են հայտերը: Այս ծրագիրը, ըստ գործադիր տնօրենի, պիլոտային է, դրական արդյունքի դեպքում այն շարունակական կլինի: Տ. Հարությունյանը նշեց, որ «գերփոքր» են առեւտրային կազմակերպություններն ու անհատ ձեռնարկատերերը, որոնց աշխատողների միջին ցուցակային թվաքանակը կազմում է մինչեւ 10 մարդ, իսկ նախորդ տարվա գործունեությունից ստացված հասույթը կամ նախորդ տարեվերջի դրությամբ ակտիվների հաշվեկշռային արժեքը չի գերազանցում 100 մլն դրամը: