Իսրայելում հակաթուրքական տրամադրությունները սրվում են
2 րոպեի ընթերցում
![Իսրայելում հակաթուրքական տրամադրությունները սրվում են](http://armenpress.am/resized/480/static/news/b/2011/09/662727.jpg)
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Իսրայելն իր ձեռքին մի քանի խաղաթղթեր ունի Թուրքիայի վրա ճնշում գործադրելու համար: Մեկնաբանելով թուրք-իսրայելական հարաբերություններում վերջին շրջանում նկատվող աննախադեպ սրացումը' «Արմենպրես»-ի հետ զրույցում նման տեսակետ հայտնեց Երուսաղեմի Հայ դատի հանձնախմբի պատասխանատու Հակոբ Սեւանը' հավելելով, որ դրա վկայություններից է նաեւ թուրք-իսրայելական ռազմական եւ առեւտրային կապերի խզումը:
«Մինչեւ երեկ այստեղ դեռ խոսվում էր որոշ հույսերի մասին, որ մոտ ապագայում հնարավոր կլինի հարաբերությունները որոշ չափով բարելավել, այսինքն' Իսրայելը սպասողական վիճակի մեջ էր, որ Թուրքիան կարող է չխզել կապերը, սակայն երկու կողմերն էլ ակնհայտորեն ցույց տվեցին, որ դեպի լավը չեն գնալու իրենց հարաբերությունները»,- նշեց Հ.Սեւանը:
Անդրադառնալով իսրայելական իշխող շրջանակներում եւ հասարակության մեջ տվյալ հարցի վերաբերյալ տիրապետող տրամադրություններին' Հ.Սեւանն ընդգծեց, որ դեռեւս Դավոսում տեղի ունեցած դեպքի օրերից, երբ մեծ վիճաբանություն էր բռնկվել Իսրայելի նախագահ Շիմոն Պերեսի եւ Թուրքիայի վարչապետ Ռեջեփ Թայիբ Էրդողանի միջեւ, զգալի էր, որ Թուրքիան է փոխել իր վերաբերմունքն Իսրայելի նկատմամբ: «Այսօր արդեն որոշ տեղեկություններ կային, որ Իսրայելի կառավարության մեջ հայտնի «ութնյակի խոհանոցի» անդամներից մեկը նշել էր' Թուրքիան վերջնականապես կխզի իր կապերը Իսրայելի հետ»,- հայտնեց Հ. Սեւանը:
Նրա կարծիքով' կառավարական նման բարձր մակարդակից հարաբերությունների վատթարացումը սպասելի էր, իսկ հասարակական մակարդակում էլ հակաթուրքական տրամադրություններն ավելանում են: «Այս օրերին Իսրայելում այդ' հակաթուրքական տրամադրությունն ավելի է շեշտվում»,- փաստեց Հ. Սեւանը: