ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Եթե որեւէ երիտասարդ, անկախ նրա կուսակցական պատկանելությունից կամ քաղաքական հայացքներից, խախտում է հասարակական կարգը, ապա անհրաժեշտ է նրան կարգի հրավիրել եւ համապատասխան պատասխանատվության ենթարկել: Այս մասին այսօր լրագրողների հետ հանդիպմանն ասաց ՀՀԿ անդամ Հովհաննես Սահակյանը' ձեռնպահ մնալով ՀԱԿ-ի երիտասարդ ակտիվիստների արարքի հետ կապված միջադեպին համապատասխան գնահատականներ տալուց:
«Եթե երկխոսում են մթնոլորտում եղած լարվածությունը նվազեցնելու համար, ապա ի՞նչ իմաստ ուներ նման ձեւով լարվածություն առաջացնելը»,- ասաց ՀՌԱԿ ատենապետ Էդվարդ Անտինյանը' կարծիք հայտնելով, որ լարվածությունը փորձում են պահել նրա համար, որ երկխոսության գործընթացից որեւէ կողմի դուրս գալն արդարացված լինի:
Անդրադառնալով երկխոսության ներկա փուլին' Հ. Սահակյանը նշեց, որ ամբողջ աշխարհում ընթանում են գործընթացներ, եւ երեւույթներն ավելի արագ են զարգանում: Հայաստանը եւս զերծ չի մնում այս գործընթացից: «Մեր քաղաքական դաշտում շատ քիչ ուժեր են կոնկրետ գործով զբաղված: Իշխանությունը, ի տարբերություն այլ ուժերի, գործ է անում»,-ասաց ՀՀԿ անդամը' նկատելով' եթե կան խնդիրներ, ապա իրենք պատրաստ են երկխոսության սեղանի շուրջ քննարկել դրանք:
Բանախոսները նշեցին, որ քաղաքական դաշտում բուռն աշխատանքային աշուն է սպասվում: