ԱՄՆ-ի հայ համայնքը կողմ կլինի Ջ. Հեֆֆերնի թեկնածությանը, եթե նրա պատասխաններում «տհաճ անակնկալներ չլինեն»
4 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Եթե Հայաստանում ԱՄՆ-ի նոր արտակարգ եւ լիազոր դեսպանի թեկնածու Ջոն Հեֆֆերնի' սենատորների գրավոր հարցադրումների պատասխաններում «տհաճ անակնկալներ չլինեն», ԱՄՆ-ի հայկական սփյուռքը կողմ կարտահայտվի նրա թեկնածությանը: Այս մասին «Արմենպրես»-ի հետ զրույցում նշեց «Կալիֆորնիան կրւրիեր» թերթի գլխավոր խմբագիր Հարութ Սասունյանը: Ամենայն հավանականությամբ, դեսպանի պատասխանները Սենատը կքննարկի սեպտեմբերին' ամառային արձակուրդից հետո:
«Մենք գիտենք, որ դեսպանն ինքը չի կարող որոշել Հայոց ցեղասպանության հարցի հանդեպ ԱՄՆ-ի պետական քաղաքականությունը, քանի որ դա նախագահի որոշելու հարցն է, ուստի հասկանում ենք' ինչու նա «ցեղասպանություն» տերմինը չի օգտագործում: Սակայն, եթե նրա գրավոր պատասխաններում հավելյալ հայտարարություններ լինեն, որոնք կասկածի տակ կդնեն Հայոց ցեղասպանության իրողությունը, մենք դեմ կարտահայտվենք, եւ լրացուցիչ խոչընդոտներ կառաջանան նրա թեկնածության հաստատման գործում»,- ասաց Հ. Սասունյանը:
Ըստ նրա' Հեֆֆերնը թուրքական լոբբիստական կառույցների հետ չի աշխատել, սակայն տարիներ առաջ եղել է մի կոնգրեսմենի օգնական, ով հանդես է եկել հակահայ գործունեությամբ: «Այս փաստը չպետք է անդրադառնա Հեֆֆերնի կեցվածքի վրա: Վերջինս այս տարիների ընթացքում հայկական հարցերի վերաբերյալ որեւէ բացասական դիրք չի չբռնել»,- ընդգծեց Հ. Սասունյանը:
Նա հիշեցրեց, որ մեր երկրում ԱՄՆ-ի արդեն նախկին արտակարգ եւ լիազոր դեսպան Մարի Յովանովիչը եւս չէր արտաբերել «Հայոց ցեղասպանություն» բառակապակցությունը: «Մենք չենք սպասում, որ ԱՄՆ-ի նոր դեսպանն իր պետական քաղաքականությանը հակառակ բառեր արտահայտի, այլ պարզապես սպասում ենք, որ չժխտի Ցեղասպանության փաստը»,- նշեց Հ. Սասունյանը:
Նրա խոսքով' ԱՄՆ-ի հայկական լոբբիստական կառույցների գործունեությունը դեսպանների հաստատման ժամանակ ուղղված է ոչ թե նրան, որ դեսպանի թեկնածուն հակասի իր ղեկավարությանը եւ «ցեղասպանություն» բառն արտասանի, այլ որպեսզի նրանց միջոցով պատգամ ուղարկվի ԱՄՆ-ի ղեկավարությանն այն մասին, որ եթե շարունակեն Հայոց ցեղասպանության' ԱՄՆ-ի կողմից ճանաչմանը դեմ արտահայտվել, նրանք խնդիրներ կունենան հայկական սփյուռքի հետ:
Հիշեցնենք, որ ավելի վաղ Սենատում կայացած լսումների ժամանակ Հեֆֆերնը համոզմունք էր արտահայտել, որ Հայաստանում ԱՄՆ-ի դեսպանի պաշտոնում հաստատվելու դեպքում, կկարողանա իր լուման ներդնել հայ-թուրքական' փակուղի մտած շփումները վերականգնելու գործում' նաեւ Անկարայում ԱՄՆ-ի դեսպանության հետ սերտ համագործակցելու եղանակով: Խոսելով Լեռնային Ղարաբաղի հակամարտության վերաբերյալ' դեսպանի թեկնածուն նշել էր այս գործընթացում ԵԱՀԿ-ի Մինսկի խմբի գործընթացի կարեւորությունը:
Անդրադառնալով 1915 թվականի իրադարձություներին' Հեֆֆերնն ասել էր, որ դրանց արդյունքում Օսմանյան կայսրության օրոք կոտորվել է մոտ մեկուկես միլիոն հայ եւ հայտարարել, որ մանրազնին աշխատանք ու ջանք է պահանջվելու պատմական փաստերն ընդունելու ճանապարհին:
«Այդ իրադարձությունների բնութագրումը քաղաքական որոշման հարց է, որն ընդունվում է ԱՄՆ-ի նախագահի կողմից, եւ որ այն արտահայտվում է ամեն տարի ապրիլքսանչորսյան ուղերձի ժամանակ»,- ասել էր Հեֆֆերնը: