Զգալի նվազել է տեղեկություններ ստանալու եւ տարածելու իրավունքի խախտումների թիվը
2 րոպեի ընթերցում
![Զգալի նվազել է տեղեկություններ ստանալու եւ տարածելու իրավունքի խախտումների թիվը](http://armenpress.am/resized/480/static/news/b/2011/07/658892.jpg)
ԵՐԵՎԱՆ, 19 ՀՈՒԼԻՍԻ, ԱՐՄԵՆՊՐԵՍ: Խոսքի ազատության առումով Հայաստանում վիճակն ավելի լավ է, քան Ադրբեջանում: Ինչպես այսօր լրագրողների հետ հանդիպման ժամանակ նշեց Խոսքի ազատության պաշտպանության կոմիտեի նախագահ Աշոտ Մելիքյանը, ԱՊՀ տարածաշրջանում փոքր-ինչ առավելություն ունեն Վրաստանն ու Ուկրաինան: Ա. Մելիքյանը նշեց, որ դրական փոփոխություն նկատվում է, սակայն դեռ զգալի անելիքներ կան, եւ պետք է ձգտել համեմատվել եվրոպական երկրներին:
Ներկայացնելով Հայաստանում 2011թ. երկրորդ եռամսյակում խոսքի ազատության վիճակը եւ լրագրողների ու ԶԼՄ-ների իրավունքների խախտումների մասին տվյալները' Ա. Մելիքյանը նշեց, որ այս տարվա երկրորդ եռամսյակում նախորդ տարվա նույն ժամանակահատվածի համեմատ նվազել է լրագրողների նկատմամբ ֆիզիկական բռնությունների թիվը: Նախորդ տարվա երկրորդ եռամսյակում գրանցվել է 3 դեպք, 2011թ-ի նույն ժամանակահատվածում' 2:
Զգալի նվազել է տեղեկություններ ստանալու եւ տարածելու իրավունքի խախտումների թիվը: Եթե 2010 թվականի 2-րդ եռամսյակում գրանցվել է տեղեկություններ ստանալու եւ տարածելու իրավունքի 5 խախտում, ապա 2011թ-ի նույն ժամանակահատվածում' 2: Այս տարի մեկ ավելի դեպք է նկատվել ԶԼՄ-ների եւ դրանց աշխատակիցների նկատմամբ ճնշումների առումով:
2010 թվականի 2-րդ եռամսյակում այդպիսի 5 դեպք է գրանցվել, իսկ 2011թվականի 2-րդ եռամսյակում' 6: