ԵՐԵՎԱՆ, 6 ՀՈՒԼԻՍԻ, ԱՐՄԵՆՊՐԵՍ: 2011-2012 ուսումնական տարվա միասնական ընդունելության քննությունների լրացուցիչ փուլին մասնակցության համար Գնահատման եւ թեստավորման կենտրոն դիմում-հայտ է ներկայացրել 1 486 դիմորդ, այն դեպքում, երբ առաջին' հիմնական, փուլին մասնակցության համար դիմել են 1 209 դիմորդներ: Դիմորդների թվի նմանատիպ աննախադեպ տարբերությունն «Արմենպրես»-ի խնդրանքով մեկնաբանեց Գնահատման եւ թեստավորման կենտրոնի տնօրեն Գուրգեն Խաչատրյանը: Նրա խոսքով'100 դիմորդ միասնական քննությունների 2-րդ փուլին մասնակցելու համար հայտագրվել է Ջավախքից, կան դիմորդներ Ուկրաինայից, Ռուսաստանի Դաշնությունից, Հնդկաստանից, Իրանից եւ նույնիսկ' Թայլանդից: «Նման ակտիվությունը կարելի է բնութագրել նրանով, որ թեստերը բավականին հեշտ են, եւ մարդիկ սկսեցին մտածել, որ եզակի տարի է եւ կարելի է փորձել: Դրա պատճառով այս տարվա դիմորդների ցանկում ընդգրկված են տարբեր տարիքային խմբերի ներկայացուցիչներ»,- ասաց Գ. Խաչատրյանը' կարեւորելով նաեւ լրատվամիջոցների ակտիվ աշխատանքը:
Կենտրոնի տնօրենի խոսքով' այս տարվա ընդունելության քննություններին հնարավորություն են ունեցել նաեւ մասնակցելու ժամկետային ծառայության մեջ գտնվող դիմորդները: «Եթե նրանք լավ հանձնեն քննությունները, կընդունվեն Վ. Սարգսյանի անվան ռազմական ինստիտուտ, հակառակ դեպքում' կշարունակեն իրենց ծառայությունը: Կարծում եմ, որ բավականին ճկուն եւ խելացի մտածված քայլ է»,- ասաց նա:
Հիշեցնենք, որ միասնական լրացուցիչ քննությանը կարող են մասնակցել պարտադիր ժամկետային զինվորական ծառայությունից նոր զորացրվածները, սփյուռքի շրջանավարտները, այն դիմորդները, ովքեր միասնական քննությունների հիմնական փուլին հարգելի պատճառով ի վիճակի չեն եղել մասնակցել, այն դիմորդները, որոնք առաջին փուլի քննություններին մասնակցելու համար չեն հայտագրվել, ինչպես նաեւ բողոքարկման հանձնաժողովի կողմից միասնական լրացուցիչ քննությանը մասնակցելու թույլտվություն ստացած շրջանավարտները: