ԼՂՀ իշխանությունները նոր հարցազրույցներ են տալու միջազգային պարբերականներին` չնայած Ադրբեջանի հիստերիկ պահվածքին
2 րոպեի ընթերցում
![ԼՂՀ իշխանությունները նոր հարցազրույցներ են տալու միջազգային պարբերականներին` չնայած Ադրբեջանի հիստերիկ պահվածքին](http://armenpress.am/resized/480/static/news/b/2011/06/655937.jpg)
ԵՐԵՎԱՆ, 17 ՀՈւՆԻՍԻ, ԱՐՄԵՆՊՐԵՍ: Լեռնային Ղարաբաղի Հանրապետության նախագահ Բակո Սահակյանի հարցազրույցը' ռուսական «Վոյեննիյ դիպլոմատ» ամսագրին, Ադրբեջանի արտգործնախարարության «զայրույթն» է առաջացրել, ինչի արդյունքում Ռուսաստանի Դաշնությունում Ադրբեջանի դեսպանատանը հանձնարարվել է այս կապակցությամբ պարզաբանումներ ստանալ ՌԴ-ի ԱԳՆ-ից:
«Արմենպրես»-ի խնդրանքով մեկնաբանալով այս լուրը, ԼՂՀ նախագահի աշխատակազմի տեղեկատվության գլխավոր վարչության պետ, քաղաքագետ Դավիթ Բաբայանը փաստեց, որ ոչ միայն Արցախի նախագահի, այլեւ ցանկացած քաղաքագետի կամ պաշտոնյայի հարցազրույց բերում է նրան, որ Ադրբեջանում սկսում է հիստերիկ պահվածք դրսեւորվել: «Սա ցույց է տալիս ադրբեջանական ժողովրդի եւ հասարակության բարոյահոգեբանական իրավիճակը եւ այն բարդույթը, որը նա զգում է Արցախի Հանրապետության նկատմամբ: ԼՂՀ-ի ներկայացուցչի ցանկացած հարցազրույց, ելույթ, յուրաքանչյուր իրադարձություն' անգամ մարդասիրական բնույթի, Ադրբեջանին ագրեսիվ, հիստերիկ իրավիճակի մեջ է գցում: Մենք դրան սովոր ենք եւ շարունակելու ենք մեր քաղաքականությունը: Առաջիկայում լինելու են այլ հարցազրույցներ' ԼՂՀ նախագահի եւ այլ պաշտոնյաների, տարբեր միջազգային պարբերականներում»,- ընդգծեց Դ. Բաբայանը:
Նրա խոսքով' Ադրբեջանն ինչքան էլ նյարդային պատասխան տա նման գործողություններին, «միեւնույն է, ԼՂՀ-ի համար դա որեւէ լուրջ դերակատարություն չի ունենալու»:
Հիշեցնենք, որ վերջերս Ադրբեջանի ԱԳՆ-ի «սեւ ցուցակում» էր հայտնվել նաեւ ռուսական մեկ այլ լրատվամիջոցի' «Էխո Մոսկվի» ռադիոկայանի խմբագրի տեղակալը, ով այցելել էր Արցախ եւ հարցազրույցներ կազմակերպել տեղի իշխանությունների' նախագահ Բ. Սահակայնի, Ստեփանակերտի քաղաքապետի հետ: