ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ: ԵԱՀԿ Մինսկի խմբի համանախագահներն իրենց հայտարարությամբ մեկ անգամ եւս վերահաստատում են, որ ղարաբաղյան խնդրի կարգավորումը պետք է իրականացվի խաղաղ ճանապարհով: Այս մասին «Արմենպրես»-ի հետ զրույցում նշեց քաղաքագետ Ալեքսանդր Մանասյանը' մեկնաբանելով համանախագահների այն հայտարարությունը, ըստ որի, եթե բանակցային սեղանին գտնվող հիմնարար սկզբունքները մոտ ժամանակներս չընդունվեն, ապա իրենք նոր հայեցակարգով հանդես կգան: Քաղաքագետի կարծիքով' հայտարարությունը պարունակում է ենթատեքստ այն մասին, որ խնդրի լուծումը պետք է գտնել բանակցային սեղանի շուրջ: Նա նկատեց, որ համանախագահներն ուշադիր հետեւում են հարցի վերաբերյալ արձագանքներին, որոնք կան ե'ւ Լեռնային Ղարաբաղում, ե'ւ Հայաստանում, ե'ւ Ադրբեջանում:
Անդրադառնալով Կազանում կայանալիք Հայաստանի եւ Ադրբեջանի նախագահների հանդիպմանը' Ա. Մանասյանը նշեց, որ շոշափելի առաջընթաց դժվար թե արձանագրվի, որեւէ մի փաստաթուղթ դժվար թե ստորագրվի: