ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: «Չափազանց կարեւոր է, որ ՄԱԿ-ի Անվտանգության խորհրդի անդամ երեք երկրները երրորդ անգամ հանդես են գալիս հայտարարությամբ' ղարաբաղա-ադրբեջանական հակամարտության մասին»- ասաց Հայաստանի Հանրապետության փոխարտգործնախարար Շավարշ Քոչարյանը Հանրային հեռուստատեսությանն այսօր տված հարցազրույցում: «Ի տարբերություն նախորդ հայտարարությունների' այստեղ կան կոնկրետ ժամկետների պահանջներ: Համանախագահներն ակնկալում եւ պահանջում են, որ արդեն Կազանում հունիսին երկրները գան հիմնարար սկզբունքների վերջնական համաձայնությանը»,- շեշտեց Շ. Քոչարյանը:
Այն հարցին, թե ինչպես ինքը կմեկնաբանի ադրբեջանական տարբեր պաշտոնյաների կողմից արված տարաբնույթ հայտարարույթունները, Շ.Քոչարյանը պատասխանեց, որ «ադրբեջանական քարոզչամեքենան խառնվել է սեփական կեղծիքի մեջ»: «Ադրբեջանը հայտնվել է խուճապի մեջ, որովհետեւ նույն հայտարարության կարեւորագույն մասը կայանում է նրանում, որ կրկին նոր ուժի կիրառումը միջազգային հանրության կողմից չի հանդուրժվելու: Ակնհայտ է, որ դա ակնարկ է Ադրբեջանի հասցեին, ով փորձում էր ուժի կիրառմամբ լուծել ԼՂ հարցը եւ այսօր դեռեւս շարունակում է սուր ճոճել»,- ընդգծեց ՀՀ փոխարտգործնախարարը: Նրա խոսքով' Բաքուն կրկին փորձում է նենգափոխել իրականությունը, եւ նրա ողջ քաղաքականությունն իրականում ուղղված է ստատուս-քվոյի պահպանմանը: «Եթե Բաքուն իրոք ցանկանում է առաջընթաց, ապա պետք է հրաժարվի քարոզչությունից, եւ այդ դեպքում միայն հնարավոր կլինի հասնել իրական արդյունքների: Բաքուն կանգնած է կեղծիքի մեջ թաղված անդունդի եզրին»,- հավելեց Շ.Քոչարյանը' շեշտելով, որ Բաքվի համար ժամանակն է' սթափվելու:
«Կազանում առաջընթացի դեպքում երեք կողմերի համար (երկու հայկական եւ ադրբեջանական) երկար ճանապարհ կա, որպեսզի մենք կարողանանք հասնել ցանկալի առաջընթացին»,- նշեց նա: