Ա. Բաղդասարյան. « Գագիկ Ծառուկյանին` Ազգային անվտանգության խորհրդի անդամ ընդունելու որոշումը համարում եմ օրինաչափ»
1 րոպեի ընթերցում
![Ա. Բաղդասարյան. « Գագիկ Ծառուկյանին` Ազգային անվտանգության խորհրդի անդամ ընդունելու որոշումը համարում եմ օրինաչափ»](http://armenpress.am/resized/480/static/news/b/2011/04/650139.jpg)
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: «Գագիկ Ծառուկյանին` Ազգային անվտանգության խորհրդի անդամ ընդունելու մասին որոշումը համարում եմ օրինաչափ ու հիմնավոր»,- լրագրողների հետ հանդիպման ժամանակ այսօր, անդրադառնալով նախօրեին ԱԱԽ նիստում ընդունված որոշմանը, նման գնահատականով հանդես եկավ ԱԱԽ քարտուղար Արթուր Բաղդասարյանը` ընդգծելով, որ «Բարգավաճ Հայաստան» կուսակցությունը քաղաքական իշխող կոալիցիայի առանցքային դերակատարներից է:
Նա նաեւ հիշեցրեց, որ նախկինում նույնպես` 2008 եւ 2009 թվականներին, ԲՀԿ-ից ԱԱԽ անդամ է եղել Ավետ Ադոնցը: Ի պատասխան այն հարցի` արդյոք այս քայլով ԱԱԽ-ն չի քաղաքականացվում, Ա. Բաղդասարյանն ասաց, որ Հայաստանում ներկայում իշխանության գործունեության համար քաղաքական պատասխանատվություն են կրում երեք կուսակցություններ, որոնք ընդգրկված են պետական կառավարման օղակներում, իսկ այդ որոշումը հենց դրա շրջանակներում է: «Միջազգային պրակտիկայում ընդունված է, որ իշխող կուսակցության անդամներն ընդգրկված լինեն ԱԱԽ կազմում»,-ասաց ԱԱԽ քարտուղարը: