Պուտինն ու Ուիթքոֆը քննարկել են ուկրաինական հակամարտությունն ու Իրանի շուրջ իրադրությունը
2 րոպեի ընթերցում
ՌԴ նախագահ Վլադիմիր Պուտինը Սանկտ Պետերբուրգի Կոնստանտինյան պալատում հանդիպել է ԱՄՆ նախագահի հատուկ բանագնաց Սթիվ Ուիթքոֆի հետ։ «Արմենպրես»-ի փոխանցմամբ՝ այս մասին հաղորդում է «ՌԻԱ Նովոստի» գործակալությունը:
Բանակցությունների սկզբում նախագահը շնորհակալություն է հայտնել Սպիտակ տան ղեկավար Դոնալդ Թրամփին՝ ուկրաինական հակամարտության կարգավորման հանդեպ ուշադրության համար, և հետաքրքրվել Նորվեգիայում ԱՄՆ-ի, Ուկրաինայի և ԵՄ-ի պատվիրակությունների հոկտեմբերի 20-ի խորհրդակցությունների արդյունքներով։
Ուիթքոֆը հայտնել է, որ Օսլոյում կայացած բանակցություններն արդյունավետ են եղել։ Նա Սանկտ Պետերբուրգ է բերել փաստաթղթեր, որոնցում ներկայացված են ռուս-ուկրաինական հակամարտության կարգավորման վերաբերյալ մոտեցումները։ Նրա կարծիքով՝ հիմքեր կան հակամարտության ավարտին հասնելու համար։
Թրամփի հատուկ ներկայացուցիչը հույս է հայտնել, որ Պուտինը կքննարկի Ռուսաստան-ԱՄՆ-Ուկրաինա բանակցությունները վերսկսելու հնարավորությունը, որոնց ընթացքում կարող են քննարկվել տեխնիկական հարցեր։
Բացի այդ, Պուտինը հայտարարել է, որ Մոսկվան պատրաստ է քննարկել ԱՄՆ-ի հետ տնտեսական համագործակցության վերականգնումը։
Նա հավելել է, որ իրեն հետաքրքրում են Իրանում ճգնաժամային իրադրության գնահատականները։ Նրա խոսքով՝ Մոսկվան պատրաստ է օգնել լուծելու հակամարտությունը։
Հանդիպմանը ներկա են նաև ՌԴ նախագահի օգնական Յուրի Ուշակովը և Ռուսաստանի Ուղղակի ներդրումների հիմնադրամի ղեկավար Կիրիլ Դմիտրիևը։
Սա Ուիթքոֆի իններորդ այցն է Ռուսաստան։