Թրամփը Կոնգրեսի թույլտվությունը պարտադիր չի համարում ամերիկացիներին 5000-ական դոլար վճարելու համար
2 րոպեի ընթերցում
ԱՄՆ նախագահ Դոնալդ Թրամփը կարծում է, որ իր վարչակազմին անհրաժեշտ չէ ստանալ Կոնգրեսի թույլտվությունը բոլոր չափահաս ամերիկացիներին 5000-ական դոլար վճարելու համար, եթե հանրապետականները երկրում կայանալիք միջանկյալ ընտրությունների արդյունքներով պահպանեն վերահսկողությունը Կոնգրեսի երկու պալատների նկատմամբ։ «Արմենպրես»-ի փոխանցմամբ՝ այս մասին նա ասել է CBS News-ին տված հարցազրույցում։
Թրամփին հարց են ուղղել՝ արդյոք վարչակազմին անհրաժեշտ է, որ Կոնգրեսի անդամները թույլ տան այդ վճարումը։
«Մենք կարծում ենք, որ ոչ, - պատասխանել է ԱՄՆ ղեկավարը։ - Կարծում եմ՝ նրանք դա կանեն, եթե մեզ դա պահանջվի։ Բայց մենք կարծում ենք, որ չի պահանջվի»:
Սեպտեմբերի 9-ին Դալասում կառավարող Հանրապետական կուսակցության ազգային համագումարում ելույթ ունենալիս Թրամփը խոստացել էր, որ բոլոր չափահաս ամերիկացիները կստանան 5 000-ական դոլար, եթե երկրում կայանալիք միջանկյալ ընտրությունների արդյունքներով հանրապետականները մեծամասնություն ստանան ինչպես Ներկայացուցիչների պալատում, այնպես էլ Սենատում։
Սպիտակ տան ղեկավարն ընդգծել էր, որ ամերիկացիները «պարտավոր կլինեն այդ փողը ծախսեն ԱՄՆ-ում»։ Նրա խոսքով՝ «դա կկոչվի Թրամփի շահութաբաժիններ»։
Կոնգրեսի միջանկյալ ընտրությունները տեղի կունենան նոյեմբերի 3-ին. դրանցում կվերընտրվեն Կոնգրեսի Սենատի 100 անդամներից 33-ը և Ներկայացուցիչների պալատի բոլոր 435 անդամները։ Հանրապետականները վերահսկում են օրենսդիր մարմնի երկու պալատները: