Պուտինն ու Թրամփը քննարկել են ԱՄՆ հատուկ բանագնացների՝ Մոսկվա և Կիև կատարած այցերի արդյունքները
1 րոպեի ընթերցում
Ռուսաստանի նախագահ Վլադիմիր Պուտինն ու ԱՄՆ նախագահ Դոնալդ Թրամփը հեռախոսազրույց են ունեցել։
Ինչպես հաղորդում է «Արմենպրես»-ը, վկայակոչելով «ՌԻԱ Նովոստին», այս մասին հայտնել է ՌԴ նախագահի օգնական Յուրի Ուշակովը։
«Հեռախոսազրույցը տևել է ուղիղ մեկ ժամ, այն եղել է կառուցողական և բավական անկեղծ»,- լրագրողներին ասել է Ուշակովը։
Նրա խոսքով՝ երկու առաջնորդները դրական են գնահատել ԱՄՆ նախագահի հատուկ ներկայացուցիչներ Սթիվ Ուիթքոֆի և Ջարեդ Քուշների՝ Մոսկվա և Կիև կատարած այցերի արդյունքները։
Ուշակովի խոսքով՝ կողմերը մանրամասն և օբյեկտիվ վերլուծել են Ուկրաինայում ընթացող հակամարտության գոտում տիրող իրավիճակը։
Նա նշել է, որ այս ուղղությամբ աշխատանքը կշարունակվի, իսկ Պուտինն ու Թրամփը պայմանավորվել են պահպանել կապը։
Միաժամանակ, ԱՄՆ նախագահը շեշտել է Ուկրաինայում հակամարտությունն ավարտելու անհրաժեշտությունը, ինչը, նրա խոսքով, հեռանկարներ կբացի հարաբերությունների վերականգնման համար: