Մոլդովայի վարչապետը հայտարարել է քաղաքացիների կենսակերպը բարելավելու և տնտեսության շարժիչները վերագործարկելու անհրաժեշտության մասին. Moldpres

Հոդվածը հրապարակվում է «Արմենպրես»-ի և Moldpres-ի միջև ստորագրված համաձայնագրի շրջանակում։

Մոլդովայի վարչապետ Վասիլե Տոֆանն օգոստոսի 7-ին Քիշնևում կայացած Սփյուռքի ֆորումում հայտարարել է, որ կառավարության հիմնական պարտականությունն է բարելավել մարդկանց կյանքը և վերագործարկել տնտեսության շարժիչները՝ երկրի զարգացումն ապահովելու համար։ «Արմենպրես»-ի փոխանցմամբ՝ այս մասին հաղորդում է Moldpres գործակալությունը։

Նրա խոսքով՝ իշխանությունները պատրաստում են միջոցառումների լայն փաթեթ, որոնք ուղղված են տնտեսական զարգացման խթանմանը, ներդրումների խրախուսմանը և Մոլդովայի ապագայի նկատմամբ քաղաքացիների վստահության վերականգնմանը։

Վարչապետն ընդգծել է, որ այս նպատակին հնարավոր չէ հասնել միայն հայտարարություններով, այլ իրականացնելով բազմաթիվ կոնկրետ գործողություններ, որոնք տեսանելի արդյունքներ են ապահովում բնակչության և գործարար միջավայրի համար։

Նա նաև նշել է, որ կառավարությունը կգործի երկու հիմնական ուղղություններով: Առաջինը վերաբերում է համակարգային բարեփոխումներին, ինչպիսիք են վարչական ստուգումների կրճատումը, հարկային համակարգի պարզեցումը և կրթական համակարգի համապատասխանեցումն աշխատաշուկայի կարիքներին: Երկրորդ ուղղությունը ներառում է ներդրումային նախագծերի ապաշրջափակմանն ուղղված նպատակային միջամտություններ:

Վարչապետի կարծիքով՝ սահմանափակ թվով հիմնական նախագծերի արագացումը կարող է էական ազդեցություն ունենալ ազգային տնտեսության վրա:

Քիշնևում ընթացող Սփյուռքի ֆորումը միավորում է մոլդովացիների աշխարհի տարբեր ծայրերից՝ գաղափարներ փոխանակելու, Մոլդովայի Հանրապետության ապագան քննարկելու և երկրի զարգացմանն ակտիվորեն մասնակցելու ուղիներ գտնելու համար։

Սփյուռքի ֆորումը կազմակերպվում է «Սփյուռքի օրեր 2026»-ի շրջանակում։ Միջոցառումներն անցկացվում են ողջ օգոստոս ամսվա ընթացքում՝ «Ուր էլ որ լինենք, Մոլդովան միավորում է մեզ» կարգախոսով։ Ծրագիրը ներառում է միջոցառումներ՝ նվիրված երիտասարդներին, մասնագետներին, սփյուռքի միությունների ղեկավարներին և Մոլդովայի Հանրապետության զարգացմանը նպաստելու ցանկություն ունեցող բոլոր քաղաքացիներին։ Միջոցառումները կազմակերպվում են վարչապետի ​​գրասենյակի Սփյուռքի հետ կապերի բյուրոյի կողմից։