Մոլդովայի վարչապետը միջազգային կազմակերպությունների ներկայացուցիչների հետ քննարկել է կառավարության ծրագրի առաջնահերթությունները․ Moldpres
3 րոպեի ընթերցում
Հոդվածը հրապարակվում է «Արմենպրես»-ի և Moldpres-ի միջև ստորագրված համաձայնագրի շրջանակում։
Մոլդովայի վարչապետ Վասիլե Տոֆանը և Մոլդովայում գործող միջազգային կազմակերպությունների և գործակալությունների ներկայացուցիչներն օգոստոսի 3-ին քննարկել են կառավարության ծրագրի առաջնահերթությունները և զարգացման գործընկերների հետ համագործակցության ուղղությունները։ «Արմենպրես»-ի փոխանցմամբ՝ այս մասին հայտնում է Moldpres-ը։
Վարչապետը շնորհակալություն է հայտնել միջազգային գործընկերներին երկրին ցուցաբերած մշտական աջակցության համար՝ նշելով, որ նրանց կողմից տրամադրված օգնությունը կարևոր դեր է խաղացել վերջին տարիների ճգնաժամերի հաղթահարման և արդիականացման հիմնական ոլորտներում առաջընթացի գործում։
«Մեր գործընկերների աջակցությունն էական է Մոլդովայի բարեփոխումների իրականացման և զարգացման նպատակներին հասնելու համար։ Հետևաբար, կառավարությունում դուք կունենաք բաց, թափանցիկ և պատասխանատու գործընկեր հանրային ռեսուրսների կառավարման գործում։ Ազնվության, կոնկրետ արդյունքների և քաղաքացիների հետ անկեղծ երկխոսության միջոցով մենք կվերականգնենք պետության նկատմամբ վստահությունը և միասին կհասնենք մեր երկրին անհրաժեշտ փոփոխություններին»,- նշել է վարչապետը։
Վարչապետը ներկայացրել է կառավարության ծրագրի հիմնական ուղղությունները՝ եվրոպական ինտեգրման գործընթացի առաջխաղացում, տնտեսության զարգացում և քաղաքացիների կարիքներին ավելի լավ արձագանքելու ունակ արդյունավետ պետության կառուցում։ Տոֆանը ընդգծել է նաև միջազգային աջակցության ուղղորդման անհրաժեշտությունը՝ պետական կառավարման կարողությունների ամրապնդման, բարեփոխումների իրականացման, բարդ ծրագրերի կառավարման և քաղաքացիների համար շոշափելի արդյունքների ապահովման նպատակով։
Հանդիպման ընթացքում քննարկվել են էներգետիկ ոլորտի առկա մարտահրավերները, Դնեստր գետի ջրային իրավիճակը, անվտանգության և պաշտպանության ոլորտներում համագործակցությունը, ենթակառուցվածքային զարգացման ծրագրերը, տնտեսության ամրապնդումն ու աշխատաշուկայի զարգացումը։Հատուկ ուշադրություն է դարձվել նաև այն միջոցառումներին, որոնք կարող են նպաստել աշխատաշուկայում կանանց մասնակցության ավելացմանը և տնտեսության մեջ նրանց ներուժի առավել արդյունավետ օգտագործմանը։