Հայտնի տնտեսագետ և հրապարակախոս Նասիմ Նիկոլաս Թալեբը հրաժարվել է մեկնել Ադրբեջան՝ ի աջակցություն Ռուբեն Վարդանյանի
3 րոպեի ընթերցում
Տնտեսագետ, աշխարհահռչակ փիլիսոփա և գրող Նասիմ Նիկոլաս Թալեբը հրաժարվել է Ադրբեջանում դասախոսությամբ հանդես գալ՝ իր մերժումը հիմնավորելով Լեռնային Ղարաբաղի նախկին պետնախարար Ռուբեն Վարդանյանի՝ Բաքվի բանտում ապօրինի պահվելու հանգամանքով։
«Արմենպրես»-ի հաղորդմամբ՝ այս մասին Նասիմ Թալեբը գրառում է կատարել X-ի իր միկրոբլոգում։
«Ինձ դասախոսություն կարդալու համար հրավիրել էին Ադրբեջան։ Ես հրաժարվեցի (նրանք զգալիորեն բարձրացրին առաջարկվող հոնորարը՝ չհասկանալով իմ էթիկան և կարծելով, թե դա կարող է որևէ բան փոխել)։ Ես ոտք չեմ դնի Ադրբեջան, քանի դեռ Ռուբեն Վարդանյանը բանտարկված է այնտեղ»,-գրել է նա։
Was asked to go to Azerbaijan for a lecture . I declined (they yuugely upped their offer, not understanding my ethics, thinking it would make a difference).
— Nassim Nicholas Taleb (@nntaleb) August 2, 2026
I will not set foot in Azerbaijan with Reuben Vardanyan jailed there.
Նասիմ Թալեբը համաշխարհային ճանաչում է ձեռք բերել իր «Սև կարապ» (The Black Swan) գրքով, որտեղ ներկայացնում է դժվար կանխատեսելի, բայց մեծ ազդեցություն ունեցող իրադարձությունների տեսությունը։ Նա նաև «Antifragile», «Fooled by Randomness» և «Skin in the Game» գրքերի հեղինակն է և համարվում է ռիսկերի, անորոշության ու ֆինանսական շուկաների վերաբերյալ ժամանակակից ամենաազդեցիկ մտածողներից մեկը։
Նա ծնվել է Լիբանանում՝ լիբանանահայերի հետ պատմական կապեր ունեցող հին հունական ուղղափառ (անտիոքյան) լևանտյան ընտանիքում։
Թալեբը Լիբանանի քաղաքացիական պատերազմի տարիներին տեղափոխվել է Միացյալ Նահանգներ, որտեղ հետագայում դարձել է ֆինանսական թրեյդեր, էսսեիստ և համաշխարհային ճանաչում ունեցող մտածող։
2023-ի դեկտեմբերին նա այցելել էր Հայաստան։
Բաքվի դատարանը փետրվարի 17-ին հրապարակել է Լեռնային Ղարաբաղի նախկին պետնախարար Ռուբեն Վարդանյանի նկատմամբ շինծու քրեական գործով դատավճիռը, որի համաձայն՝ Վարդանյանը դատապարտվել է 20 տարվա ազատազրկման։
Մեղադրող դատախազը Ռուբեն Վարդանյանի համար պահանջել էր ցմահ ազատազրկում։
Ռուբեն Վարդանյանն Ադրբեջանի իրավապահների կողմից ապօրինի ձերբակալվել և Բաքու էր տեղափոխվել 2023 թվականի սեպտեմբերի 27-ին՝ Լեռնային Ղարաբաղի դեմ Ադրբեջանի ռազմական ագրեսիայից հետո։ Ադրբեջանում նրան կեղծ մեղադրանքներ են առաջադրվել մի քանի հոդվածներով։