Վրաստանի ամբողջ տարածքում երկու օրվա ընթացքում էլեկտրաէներգիայի արդեն երկրորդ մասշտաբային անջատումն է տեղի ունեցել

Վրաստանում 2 օրվա ընթացքում էլեկտրաէներգիայի արդեն երկրորդ մասշտաբային անջատումն է տեղի ունեցել. հուլիսի 24-ի լույս 25-ի գիշերն առանց լույսի է մնացել գրեթե ամբողջ երկիրը։

«Արմենպրես»-ի փոխանցմամբ՝ այս մասին հայտնում են վրացական լրատվամիջոցները՝ մատնանշելով, որ սոցիալական ցանցերի օգտատերերը հաղորդում են, որ Վրաստանի մի քանի քաղաքներ, այդ թվում՝ մայրաքաղաքը, մոտավորապես ժամը 8:00-ից առանց էլեկտրաէներգիայի են մնացել։ 

Նշվում է, որ էլեկտրաէներգիայի անջատումներ են տեղի ունեցել նաև շրջաններում։ Ստեղծված արտակարգ իրավիճակի պատճառով Թբիլիսիի մետրոն չի գործել, իսկ երկրի արևմտյան մասում գնացքների երթևեկությունը դադարեցվել է։

Անջատումից որոշ ժամանակ անց վրացական պատկան մարմինները սկսել են փուլ առ փուլ վերականգնել էլեկտրաէներգիայի մատակարարումը։ 

Նման իրավիճակ է տեղի ունեցել նաև հուլիսի 24-ին՝ մոտավորապես ժամը 00:10-ին։ Վրաստանի էլեկտրոցանցում էլեկտրաէներգիայի անջատման պատճառով խափանումներ են տեղի ունեցել էլեկտրաէներգիայի և հեռահաղորդակցության ցանցերում: Արդյունքում, Թբիլիսիում և Վրաստանի շրջանների մեծ մասում էլեկտրաէներգիան ժամանակավորապես անջատվել է: