Գևորգ Պապոյանն ու Դեյվիդ Ալենը քննարկել են ԱՄՆ-ի կողմից ՀՀ-ին Շուկայական տնտեսություն ունեցող երկրի կարգավիճակ շնորհելու գործընթացը
2 րոպեի ընթերցում
Հայաստանի էկոնոմիկայի նախարար Գևորգ Պապոյանը հուլիսի 23-ին ընդունել է ՀՀ-ում ԱՄՆ գործերի ժամանակավոր հավատարմատար Դեյվիդ Ալենին և ԱՄՆ դեսպանատան տնտեսական և առևտրային բաժնի ղեկավար Էդվարդ Այկլերին։
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ էկոնոմիկայի նախարարությունը։
Հանդիպման ընթացքում կողմերը վերահաստատել են, որ Հայաստանի և ԱՄՆ-ի միջև տնտեսական համագործակցությունը դինամիկ զարգանում է՝ արձանագրելով վերջին շրջանում գրանցված դրական առաջընթացը։
Քննարկվել են նաև ԱՄՆ-ի կողմից Հայաստանին Շուկայական տնտեսություն ունեցող երկրի կարգավիճակ (ՇՏԿ) տրամադրելու գործընթացին առնչվող հարցեր։
Նախարարը վստահություն է հայտնել, որ ձևավորված արդյունավետ գործակցությունը կնպաստի գործընթացի հետևողական առաջմղմանը և փոխադարձ հետաքրքրություն ներկայացնող տնտեսական օրակարգի հետագա զարգացմանը։
ԱՄՆ-ի կողմից որևէ երկրի «Շուկայական տնտեսություն ունեցող երկրի» (Market Economy Status, MES) կարգավիճակ տրամադրելը նշանակում է, որ Վաշինգտոնը պաշտոնապես ընդունում է, որ այդ երկրի տնտեսությունում գներն ու ծախսերը հիմնականում ձևավորվում են շուկայական մեխանիզմներով, այլ ոչ թե պետության ուղղակի վերահսկողությամբ։ Այս կարգավիճակը կարող է բարելավել երկրի ներդրումային հեղինակությունը, հեշտացնել որոշ արտադրողների մուտքը ԱՄՆ շուկա, նվազեցնել հակադեմփինգային գործերով լրացուցիչ մաքսատուրքերի ռիսկը, ցույց տալ, որ ԱՄՆ-ն տվյալ երկրի տնտեսական համակարգը համարում է առավել շուկայական։