Անուշիկ Ավետյանն ու Գոհար Աբաջյանը Հռոմում քննարկել են Հայաստանում CIHEAM Bari-ի փորձի կիրառման հնարավորությունները
1 րոպեի ընթերցում
Հռոմում՝ Իտալիայում ՀՀ դեսպանությունում, տեղի է ունեցել Հայաստանի էկոնոմիկայի նախարարի տեղակալ Անուշիկ Ավետյանի, Ներդրումների աջակցման կենտրոն հիմնադրամի տնօրեն Գոհար Աբաջյանի հանդիպումը CIHEAM Bari-ի տնօրեն Բիաջո Դի Տերլիցիի գլխավորած պատվիրակության հետ։
Ինչպես «Արմենպրես»-ը տեղեկանում է Իտալիայում Հայաստանի դեսպանության տարածած հաղորդագրությունից, CIHEAM Bari-ի ներկայացուցիչները ներկայացրել են կազմակերպության կառուցվածքը, նպատակները, գործունեության հիմնական ուղղությունները և առկա հնարավորությունները, աշխարհի տարբեր երկրներում իրականացվող ծրագրերը:
Քննարկվել են Հայաստանում CIHEAM Bari-ի փորձի կիրառման, համատեղ ծրագրերի իրականացման և երկարաժամկետ ինստիտուցիոնալ ներկայության ձևավորման հնարավորությունները։
Զրուցակիցները պայմանավորվել են հայկական կողմի առաջնահերթությունների և CIHEAM Bari-ի մասնագիտական հնարավորությունների հիման վրա մշակելու ծրագրի նախնական նախագիծ, որը հետագայում կարող է իրականացվել կազմակերպության ներգրավմամբ։