1 րոպեի ընթերցում
Իսպանիայում անտառային հրդեհի հետևանքով ոչնչացված տարածքը գերազանցել է վեց հազար հեկտարը։
Ինչպես հաղորդում է «Արմենպրես»-ը, այս մասին հայտնում է իսպանական Pais թերթը՝ հղում անելով Անդալուսիայի ինքնավար համայնքի փոխնախագահ Անտոնիո Սանսին։
Անդալուսիայի իշխանությունները ավելի վաղ հայտնել էին, որ հրդեհը տարածվել է ավելի քան երեք հազար հեկտար տարածքում։
«Ալմերիայում անտառային հրդեհն արդեն ոչնչացրել է 6 հազար 600 հեկտար», - ասվում է հրատարակության մեջ։
Թերթի տվյալներով՝ Սանսը բացատրել է, որ հրդեհի վայրում եղանակային պայմանները փոխվել են, ինչը կարող է հեշտացնել հրդեհի մարումը։
Անտառային հրդեհը սկսվել է հուլիսի 9-ին Ալմերիա նահանգի Լոս Գալյարդոս համայնքում։ Իշխանությունները տարհանել են մի քանի շրջանների բնակիչների, բնակիչների մի մասը տեղավորվել է ժամանակավոր կացարաններում։
Հրդեհաշիջման աշխատանքները բարդանում են դժվարանցանելի տեղանքով, որը ներառում է բազմաթիվ կիրճեր։ Աշխատանքներում ներգրավված են հարյուրավոր մասնագետներ, ինքնաթիռներ և Իսպանիայի ռազմական արտակարգ իրավիճակների ստորաբաժանումը։