2 րոպեի ընթերցում
Ռուսաստանը պատրաստ է ամեն կերպ նպաստել Ադրբեջանի մերձեցմանը Եվրասիական տնտեսական միության հետ, ինչը կամրապնդի տնտեսական կապերն ընդհանուր տարածքում: «Արմենպրես»-ի փոխանցմամբ՝ NEWS.ru-ի թղթակիցը տեղեկացնում է, որ այս մասին հայտարարել է Ռուսաստանի արտաքին գործերի փոխնախարար Միխայիլ Գալուզինը Սանկտ Պետերբուրգի միջազգային տնտեսական ֆորումի շրջանակներում:
Գալուզինի գնահատմամբ՝ սա դրական ազդեցություն կունենա Ադրբեջանի տնտեսության վրա՝ ընդհանուր ապրանքների շուկա մուտք գործելու և տրանսպորտի, ծառայությունների ու ներդրումների ոլորտներում ընդլայնված համագործակցության միջոցով:
«Մենք պատրաստ ենք ամեն կերպ նպաստել Ադրբեջանի մերձեցմանն այս ինտեգրացիոն միավորման հետ, քանի որ կարծում ենք, որ դա կնպաստի մեր ընդհանուր եվրասիական տարածքում առկա տնտեսական կապերի հետագա ամրապնդմանը: Ավելին, մենք կարծում ենք, որ դա դրական ազդեցություն կունենա Ադրբեջանի տնտեսության վրա, քանի որ երկիրը կստանա ընդհանուր ապրանքների շուկայի առավելություններից օգտվելու հնարավորություն և կկարողանա ընդլայնել համագործակցությունը տրանսպորտի, ծառայությունների և ներդրումների ոլորտներում», - ասել է Գալուզինը:
Փոխնախարարը նաև նշել է, որ լինելով Ռուսաստանին սահմանակից երկիր՝ Ադրբեջանը կարող է դառնալ եվրասիական մեծ տարածքում կարևոր տրանսպորտային և լոգիստիկ հանգույցներից մեկը: Նա ընդգծել է, որ ռուսական կողմը նպատակ ունի հասնել Հարավային Կովկասի մայրուղիների ներդաշնակ և փոխլրացնող կապակցվածության:
Իր հերթին, ՏԱՍՍ-ը նշում է, որ Գալուզինը ֆորումի շրջանակներում նաև հայտնել է Բաքվի հետ հարաբերություններն ամեն կերպ զարգացնելու տրամադրվածության մասին:
ՌԴ ԱԳՆ խոսնակ Մարիա Զախարովան նույնպես հայտարարել է, որ Մոսկվան նպատակադրված է հետևողականորեն զարգացնելու Ադրբեջանի հետ երկկողմ կապերի ամբողջ համալիրը: