Տավարաբուծության զարգացումը խթանող նոր ծրագիր. Կառավարությունը կսուբսիդավորի տոհմային կենդանիների արժեքի 50 տոկոսը

Տավարաբուծության զարգացմանը խթանելու նպատակով կառավարությունը ծրագիր է մեկնարկում․ տոհմային կենդանիների ձեռքբերման դեպքում պետությունը կհատուցի արժեքի 50 տոկոսը, իսկ վարկային միջոցներով ձեռքբերման դեպքում կսուբսիդավորի նաև տոկոսադրույքն՝ ամբողջությամբ։ 

«Արմենպրես»-ի փոխանցմամբ՝ այս մասին «Ֆեյսբուք»-ի իր էջում հրապարակված տեսանյութում տեղեկացրել է ՀՀ էկոնոմիկայի նախարար Գևորգ Պապոյանը։

Նախարարի խոսքով՝ ծրագիրը միտված է տավարաբուծության զարգացմանը և գյուղացիական տնտեսությունների արտադրողականության բարձրացմանը։

«Լավ լուր այն քաղաքացիների համար, որոնք ցանկանում են զբաղվել տավարաբուծությամբ․ տոհմային կենդանիներ ձեռք բերելու դեպքում Կառավարությունը կսուբսիդավորի արժեքի 50 տոկոսը»,- նշել է Պապոյանը։

Նրա տեղեկացմամբ՝ վարկային միջոցներով ձեռքբերման դեպքում Կառավարությունն ամբողջությամբ կսուբսիդավորի նաև վարկի տոկոսադրույքը։ Միաժամանակ, ծրագրի շրջանակում շահառուները առաջին մեկուկես տարվա ընթացքում մայր գումարի մարում չեն իրականացնի, և այն կսկսվի միայն մեկուկես տարի անց։

Պապոյանը հայտնել է նաև, որ ծրագրով հնարավոր կլինի ձեռք բերել մեկից մինչև 1000 տոհմային կենդանի, իսկ յուրաքանչյուր կենդանու համար սահմանված առավելագույն արժեքը կազմում է մինչև 1 միլիոն դրամ։

Ծրագիրը թույլ է տալիս կենդանիներ ձեռք բերել ինչպես Հայաստանի ներքին շուկայից, այնպես էլ ներմուծման միջոցով։